ساكەن مايعازيەۆ اتاق الۋعا كەلگەندە پەندەشىلىككە بوي الدىرعانىن ايتتى
بۇل تۋرالى ول «حابار» ارناسىنىڭ «كومپرومات» باعدارلاماسىندا ايتىپ بەردى.
ەندى عانا تۇساۋى كەسىلىپ وتىرعان باعدارلامانىڭ العاشقى سانى ءانشى ساكەن مايعازيەۆقا ارنالدى. ءتورت جۋرناليستىڭ «شىمشىپ» الاتىن سۇراقتارى ساكەن مايعازيەۆتى باسقا قىرىنان كورسەتتى. اسىرەسە، پەندەشىلىك، ىشكى ەسەپ سياقتى ادام بويىنداعى قاسيەتتەرگە كەلگەندە، ءانشى شىن مانىندە پەندەشىلىك جەتەگىنە ەرگەن كەزدەرى بولعانىن جاسىرماي ايتتى. ول حالىق اراسىندا جۇرگەن الىپ-قاشپا اڭگىمەلەردىڭ دە راستىعىن مويىندادى.
ونىڭ ايتۋىنشا، ەڭبەك سىڭىرگەن مادەنيەت قايراتكەرى اتاعى وسىدان بىرنەشە جىل بۇرىن ەڭ ءبىرىنشى رەت ساكەنگە ۇسىنىلعان ەكەن. ساكەن ءوتىپ تۇرىپتى. ءبىراق، سىيلىقتى الىپ كەتۋگە شاقىرعان كەزدە، ساكەن ونىڭ مەيرامبەككە بەرىلمەيتىنىن ءبىلىپ، باس تارتىپتى.
«ءيا، بۇل راس اڭگىمە، مەنى شاقىردى جاس وتاننان، ۇسىندى. سودان كەيىن مەن سوڭعى ساتتە، مەيرامبەكتىڭ جوعىن ءتۇسىندىم دە، جوق، ماعان كەرەك ەمەس دەدىم»، - دەدى ءانشى باعدارلامادا.
«ءسىز شىنىمەن مەيرامبەكتى شىنايى تۇردە وزىڭىزدەن بيىك قوياسىز با نەمەسە ءسىز قوعامدىق پىكىردەن قورىقتىڭىز با؟»، - دەگەن سۇراققا، ول:
«مەنىڭ الدىمدا، مەدەۋ ارىنبايەۆ، لۇقپان تۇرعاندا، توقتار، مەيرامبەك تۇرعاندا مەن ونى قالاي الار ەدىم؟!»، - دەگەن جاۋاپ قايىردى. دەگەنمەن، وسى تۇستا ساكەن ءوزىنىڭ بويىنداعى پەندەشىلىكتىڭ دە بولعانىن مويىندادى.
ماسەلەن، كەيىننەن «قازاق كونسەرت» تاعى دا ءبىرقاتار انشىلەردى قايراتكەرلىككە ۇسىنىپ، تىزىمدە بار ورىنداۋشىلاردى اتاعان. ءتىزىم بويىنشا مەيرامبەك، كەنجەبەك ءجانابىلوۆ، تاحمينا دەپ ت. ب. انشىلەردىڭ ەسىمدەرى اتالىپ كەتە بارعان. ءوز ەسىمى اتالماعانىن كورگەن ءانشى سول تۇستا ءانشى ءوز-وزىنە:
«ءا، ساكەن كەزىندە ۇسىنعان كەزدە الماپ ەدىڭ، ەندى، مىنە، كور»، - دەگەنىن جاسىرمادى.
«ءبىر 5-6 سەكۋند ىشىندە بۇكىل ءومىرىم كوز الدىما كەلدى. ءبىراق، از ۋاقىتتان كەيىن مەنىڭ دە فاميليام اتالدى. سويتسەم، الفاۆيت بويىنشا اتاپ كەلە جاتقان ەكەن»، - دەگەن ساكەن، ءوزىنىڭ قانداي دا ءبىر ىشكى ەسەبىنىڭ بولعانىن ءبىلدىرىپ قويدى.
ەستەرىڭىزگە سالساق، «حابار» ارناسىنىڭ «كومپرومات» باعدارلاماسى وسى جەكسەنبىدەن باستاپ ەفيرگە شىعادى. وعان وتاندىق ەسترادا جۇلدىزدارى كەلىپ، ءتۇرلى سۇراقتارعا جاۋاپ بەرەدى. باعدارلاما پروديۋسەرى گۇلنۇر ماماساريپوۆانىڭ ايتۋىنشا، بۇل باعدارلاما ارقىلى «جۇلدىزداردىڭ» شىنايى ادامي بولمىسىن اشىپ، ولاردى حالىققا باسقا قىرىنان كورسەتۋ كوزدەلىپ وتىر.
