ورالدا «ءتىل - تۇتاستىق تۋى» اتتى فەستيۆال ءوتتى
ب ق و تىلدەردى دامىتۋ باسقارماسى مەن «ەۋرازيا الەۋمەتتىك-گۋمانيتارلىق زەرتتەۋ ورتالىعى» قوعامدىق بىرلەستىگى ۇيىمداستىرعان مەرەكەلىك شاراعا قاتىسۋشىلاردى باتىس قازاقستان وبلىسىنىڭ اكىمى التاي كولگىنوۆ قۇتتىقتادى.
«ءداستۇرلى ءتىل فەستيۆالى اياسىندا بيىلدىڭ وزىندە وننان استام شارالار ۇيىمداستىرىلىپ، وعان ءتىل جاناشىرلارى بەلسەنە اتسالىستى. ەلىمىز تاۋەلسىزدىك العاننان كەيىن قازاقستاندى بۇكىل الەم تانىدى. وسىنىڭ ءبارى - بىرلىكتىڭ، ەڭبەكتىڭ، ەلباسىمىز جۇرگىزىپ وتىرعان ساياساتتىڭ، سان ۇلت وكىلدەرى اراسىنداعى كەلىسىم مەن تاتۋلىقتىڭ ارقاسى. ەلىمىزدە ءار ۇلت وكىلدەرى ءوز انا ءتىلىن ءبىلىپ، سالت-ءداستۇرىن دامىتۋعا مۇمكىندىك الدى. سونىڭ ىشىندە، ارينە، تەمىرقازىق ىسپەتتەس مەملەكەتتىك ءتىلدىڭ ورنى بولەك. مەملەكەت باسشىسى نۇرسۇلتان ءابىش ۇلى نازاربايەۆتىڭ اتاپ وتكەنىندەي، «كەز كەلگەن مەملەكەتتىڭ وزەگى - ونىڭ بىرەگەي مەملەكەتتىك ءتىلى».
ەندەشە، «وزگە ءتىلدىڭ ءبارىن ءبىل، ءوز ءتىلىڭدى قۇرمەتتە...» دەپ قادىر اقىننىڭ ايتقانىنداي، سول ءتىلىمىزدى ساقتاۋ، جوعالتىپ الماۋ ءوز قولىمىزدا. قازىرگىدەي جاھاندانۋ داۋىرىندە ءومىر ءسۇرىپ جاتقاندىقتان، ءبىز دە شەكاراسى اشىق، ەركىن مەملەكەتپىز. وسىدان جيىرما بەس جىل بۇرىن ەل قانداي ەدى، قازىر قاندايمىز. ارينە، ايىرماشىلىق جەر مەن كوكتەي. ەندىگى ماقسات-مىندەتىمىز دە وسى تابىستارىمىزدى باياندى ەتىپ، ماڭگىلىك ەل بولۋ جولىندا ۇلكەن-كىشىمىز بىردەي قايرات قىلۋ بولسا كەرەك»، دەدى اكىم.
فەستيۆال بارىسىندا ءتىل جاناشىرلارى ق ر مادەنيەت جانە سپورت مينيسترلىگىنىڭ قۇرمەت گراموتاسىمەن، سونداي-اق وبلىس اكىمىنىڭ العىس حاتتارىمەن ماراپاتتالدى.
