ءبىز ورىستاندىرۋدان ارىلىپ، ارابتاندىرۋعا بوي الدىرىپ بارا جاتقان سياقتىمىز

استانا. قازاقپارات - بۇگىن استانالا وتكەن «قازىرگى كەزەڭدەگى ەكسترەميزم مەن تەرروريزمنىڭ الدىن الۋ مەن جولىن كەسۋدىڭ زاڭنامالىق جانە ينستيتۋتسيونالدىق شارالارى» تاقىرىبىنداعى

«دوڭگەلەك ۇستەل» وتىرىسىندا قوعام بەلسەندىسى مۇحتار تايجان تەرروريزممەن كۇرەس جولىندا سالافيزمدى تىيۋ ماسەلەسىن كوتەردى. سونداي-اق ول «ۇلتشىلدىق» دەگەن تۇسىنىكتەن ارىلۋ قاجەتتىگىن جەتكىزدى. سەبەبى بۇل - وتارلاۋ ساياساتىنىڭ پسيحولوگياسى، دەپ حابارلايدى Baq.kz ءتىلشىسى.

«شىنىندا، بۇگىندە ۇلتتىق يدەولوگيانى كۇشەيتۋ كەرەك. ول يدەولوگيا جوعارى دەڭگەيدە بولسا، وعان ەشقانداي سالافيتتەر قاۋىپ توندىرە المايدى. وكىنىشكە قاراي، بۇگىنگى وتىرىس بارىسىندا ءبىز سالافيزم تۋرالى مۇلدەم ايتپاپپىز. مەنىڭشە، قازىرگى كەزدە ءبىز ورىستاندىرۋ ساياساتىنان ارىلىپ، ارابتاندىرۋ اياساتىنا بوي الدىرىپ بارا جاتىرمىز. ويتكەنى سالافيتتەردىڭ ايتۋىنشا، شەلپەك پىسىرۋگە بولمايدى، اس بەرۋگە رۇقسات جوق، زيرات باسىندا قۇران وقۋعا دا بولمايدى. ول نە دەگەن ءسوز؟ قازاق بولما دەگەن ءسوز ەمەس پە؟ سوندىقتان وتكەندە اقتوبەدەگى وقيعالاردان كەيىن پرەزيدەنت تە ايتتى عوي، وعان سالافيتتەردىڭ قاتىسى بولسا، وعان تىيىم سالۋ قاجەت»، - دەدى م. تايجان.

سونداي-اق قوعام قايراتكەرى ۇلتشىلدىق پەن پاتريوتيزم ماسەلەسىن شاتاستىرماۋعا كەڭەس بەردى.

«جاڭا بايانداما جاساعان ىقسانوۆا حانىم (دەپۋتات - اۆت.) ۇلتشىلدىق تۋرالى ايتتى. ءبىراق سوڭعى 10-15 جىلدا مەن ونداي ماسەلە جايىندا ەستىگەن ەمەسپىن. نەگىزى، بىزگە «ۇلتشىلدىق» دەگەن سوزدەن ارىلۋ قاجەت. سەبەبى بۇل - وتارلاۋ ساياساتىنىڭ تەرميندەرى. سول كەزدە حان كەنەنى، الاشورداشىلاردى، جەلتوقسانشىلاردى ۇلتشىلدار دەپ اتادى. الايدا ارتىنان ءبىز ولارعا ەسكەرتكىشتەر قويدىق. اقىر سوڭىندا ولار پاتريوت بولىپ شىقتى»، - دەپ اتاپ كورسەتتى م. تايجان.