ءبىز كوپ تۇتىناتىن «انالگيننەن» الەم نەگە باس تارتتى؟

استانا. قازاقپارات - ءبىز كوپتەگەن جىلدار بويى قولدانىلىپ كەلە جاتقان دارىلەردىڭ كەيبىرەۋى دەنساۋلىعىمىزعا ايتارلىقتاي زيان كەلتىرۋى مۇمكىن.

مىسالى، انالگين - دارىگەردىڭ رۇقساتىنسىز ءدارىحانادان ساتىپ الۋعا بولاتىن ەڭ قولجەتىمدى جانە ەڭ تانىمال ءدارى. الايدا، ەۋروپا دارىگەرلەرى انالگيننىڭ ادام دەنساۋلىعىنا قاۋىپتى ەكەندىگىن ايتادى.

بۇنىڭ باستى سەبەبىن ادام اعزاسىنىڭ انالگينگە تەز تاۋەلدى بولاتىندىعىمەن تۇسىندىرەدى، دەپ حابارلايدى Baq.kz ءتىلشىسى.

بۇكىل الىمدىك دەنساۋلىق ساقتاۋ ۇيىمىنىڭ دەرەگى بويىنشا، قازىرگى ۋاقىتتا الەمدە 39 ەل بۇل ءدارىنى قولدانۋدان باس تارتقان. كەيبىر ەلدەردە، مىسالى، گەرمانيادا انالگين قولدانىستا بولعانىمەن، دارىگەردىڭ قاتاڭ رۇقساتىمەن تاعايىندالادى. ال، ت م د ەلدەرىندە اتالعان ءدارى ءدارىحانالاردان دارىگەردىڭ رەتسەپىنسىز بوساتىلىپ، ەشقانداي شەكتەۋسىز قولدانىلادى. وسى جانە جالپى حالىقتىڭ دارىلىك ساۋاتتىلىعى قانداي، ءدارى-دارمەكتى ساۋاتتى قولدانۋدىڭ حالىق دەنساۋلىعىنا جانە قوعامعا اسەرى قانداي، تۇرعىنداردىڭ دارىلىك ساۋاتتىلىعىن ارتتىرۋ ءۇشىن نە ىستەۋ كەرەك دەگەن سۇراقتار ق ر دەنساۋلىق ساقتاۋ جانە الەۋمەتتىك دامۋ مينيسترلىگى «دەنساۋلىق ساقتاۋدى دامىتۋ رەسپۋبليكالىق ورتالىعىنىڭ» ۇيىمداستىرۋىمەن وتكەن «قازاقستانداعى دارىلىك ساۋاتتىلىق» اتتى سەميناردا تالقىلاندى.

«جاسىرعاننىڭ جاراسى اسقىنادى» دەمەكشى اۋىرا قالساق دارىگەردىڭ الدىنا بارعاننان گورى تانىستارىمىزدىڭ نەمەسە عالامتوردىڭ كەڭەسىنە سۇيەنىپ، ءوز بەتىمىزشە ءدارى قابىلدايتىنىمىز جاسىرىن ەمەس. وسىلايشا دارىلىك زاتتاردى ءوز بەتىمەن قابىلداۋ كوپ جاعدايدا اۋرۋدىڭ اسقىنۋىنا اكەلىپ سوعادى.

«ءدارى-دارمەكتى وزىندىك قابىلداۋدان كەيىن بولاتىن قايعىلى جاعداي 300 ادامعا شاققاندا بىرەۋ بولسا، بۇل كورسەتكىش اۋە اپاتىندا 3 ميلليونعا ءبىر ادامنان كەلەدى»، - دەيدى سەميناردا ءسوز العان دەنساۋلىق ساقتاۋدى دامىتۋ رەسپۋبليكالىق ورتالىعىنىڭ ءتوراعاسى ل. گ. ماكالكين.

دارىلىك زاتتاردى قابىلداۋ الدىندا مىندەتتى تۇردە دارىگەرمەن كەڭەسكەن ءجون دەيدى ماماندار. كوپتەگەن ادامدار، اۋرۋدىڭ باستاپقى بەلگىلەرى پايدا بولىسىمەن اعزاعا كەرى اسەرىن تيگىزەتىن دارىلەردى، سونىڭ ىشىندە انتيبيوتيكتەردى ءوز بەتىمەن قابىلداي باستايدى.

ەستەرىڭىزگە سالا كەتەيىك، ءدارىنىڭ اتاۋىن، قاجەتتى دوزاسىن جانە ەمدەۋ ۇزاقتىعىن دارىگەر عانا بەلگىلەيدى. انتيبيوتيكتەردى تەك دارىگەردىڭ تاعايىنداۋىمەن قابىلداۋ قاجەت. ولاردى قاجەتىنسىز، شامادان تىس نەمەسە دۇرىس ەمەس قابىلداۋ انتيبيوتيككە تاۋەلدىلىككە ۇرىندىرادى.

انتيبيوتيكتەردى قازىرگى كەزدە كوپ ادامدار جەڭىل سۋىق تيۋ كەزىندە دە قابىلدايدى. بالالاردى دا انتيبيوتيكتەرمەن وزدىگىنشە ەمدەۋگە ارەكەتتەنەتىن اتا-انالاردىڭ پوزيتسياسى دا دارىگەرلەردىڭ الاڭداۋشىلىعىن تۋعىزادى. ماماندار تۇجىرىمداعانداي، ەمدەۋ مادەنيەتىن، دارىلىك ساۋاتتىلىقتى بالا كەزدەن باستاپ دامىتۋ قاجەت.