قىزىلوردادا شوقاي تانۋ عىلىمي-زەرتتەۋ ورتالىعى اشىلدى

قىزىلوردا. قازاقپارات - بۇگىن قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە «مۇستافا شوقاي تانۋ» عىلىمي-زەرتتەۋ ورتالىعى اشىلدى.

ۋنيۆەرسيتەتتىڭ باسپا ءسوز قىزمەتىنىڭ حابارلاۋىنشا، جاڭا ورتالىقتىڭ قۇرىلۋىنا «مۇستافا شوقاي - الاشتىڭ الىپ تۇلعاسى» اتتى رەسپۋبليكالىق عىلىمي-تاجىريبەلىك كونفەرەنتسيادا قابىلدانعان ۇسىنىمدار نەگىز بولعان. وبلىس اكىمى قىرىمبەك كوشەربايەۆتىڭ تاپسىرماسىمەن مۇستافا شوقايدىڭ شىعارماشىلىعىن زەرتتەۋ، تىڭ دەرەكتەردى عىلىمي اينالىمعا ەندىرۋ ءۇشىن وسى ورتالىق اشىلىپ وتىر.

شاراعا وبلىس اكىمىنىڭ ورىنباسارى رۋسلان رۇستەم ۇلى، وبلىستىق ءماسليحات حاتشىسى ناۋرىزباي بايقاداموۆ، تاريح عىلىمدارىنىڭ دوكتورى، پروفەسسور، م. شوقايدىڭ 12 تومدىق شىعارمالار جيناعىن قۇراستىرۋشى «مۇستافا شوقاي تانۋ» عىلىمي-زەرتتەۋ ورتالىعىنىڭ عىلىمي جەتەكشىسى كوشىم ەسماعامبەتوۆ، ساياسي عىلىمدارىنىڭ دوكتورى، پروفەسسور، مۇستافا شوقاي مۇراسىن زەرتتەۋشى عالىم ابدىجالەل باكىر، مۇستافا شوقاي اتىنداعى قوعامدىق قوردىڭ ءتوراعاسى بازارباي اتابايەۆ قاتىستى.

ورتالىقتىڭ اشىلۋ سالتاناتىندا العاشقى ءسوزدى قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ رەكتورى، تەحنيكا عىلىمدارىنىڭ دوكتورى، پروفەسسور قىلىشباي بيسەنوۆ سويلەپ، جاڭا ورتالىق وقۋ ورنىندا ءبىلىم الۋشىلاردىڭ رۋحاني پاتريوتتىق سەزىمىنىڭ نىعايۋى جولىندا ماڭىزدى ەكەندىگىنە توقتالدى.

«مۇستافا شوقاي تانۋ» عىلىمي-زەرتتەۋ ورتالىعىندا كورنەكتى قايراتكەردىڭ سۋرەتتەرى، جازعان ەڭبەكتەرى كورمەگە قويىلعان. سونداي-اق جاڭادان اشىلعان ارنايى ورتالىقتا مۇستافا شوقايدىڭ ءبيۋستى ورنالاسقان.

شارا بارىسىندا مۇستافا شوقاي اتىنداعى قوعامدىق قوردىڭ ءتوراعاسى بازارباي اتابايەۆ الاش قايراتكەرى مۇستافا شوقايدى زەرتتەۋدەگى ەڭبەگى ءۇشىن قورقىت اتا اتىنداعى التىن مەدالمەن ماراپاتتالدى.

ايتا كەتەرلىگى، جاس ۇرپاققا تۇركى حالىقتارىنىڭ كوسەمى مۇستافا شوقايدىڭ مول مۇرالارىن تانىستىرۋ، ناسيحاتتاۋ ءۇشىن 2016-2017 وقۋ جىلىنان باستاپ ۋنيۆەرسيتەتتەگى باكالاۆرياتتىڭ گۋمانيتارلىق-پەداگوگيكالىق ماماندىقتارى ستۋدەنتتەرىنە «شوقاي تانۋ» ارناۋلى كۋرسى ەنگىزىلىپ، وقىتىلۋدا.

اۆتور: ەلۋباي اۋەزوۆ