تەرروريزمگە قارسى ءىس-قيمىل زاڭ جوباسى ماجىلىستە ءالى دە پىسىقتالادى - جانات جاراسوۆ
بۇل تۋرالى ق ر پارلامەنتى ءماجىلىسىنىڭ دەپۋتاتى جانات جاراسوۆ ءمالىم ەتتى.
«بۇل نورمالاردىڭ (جەكە تۇلعالاردىڭ تىركەلۋ ءتارتىبىن بۇزعانى ءۇشىن جاۋاپكەرشىلىكتى كۇشەيتۋ) ەنگىزىلۋى قوعام تارابىنان الاڭداۋشىلىق تۋىنداتقانى وتە دۇرىس دەپ ەسەپتەيمىن. بۇل پارلامەنتتىڭ بارلىق تاراپتاردى مۇلتىكسىز تىڭداۋى، تىڭعىلىقتى قاراستىرۋى، سودان كەيىن بارىپ بۇل زاڭ جوباسىنا ەڭ لايىقتى، ءتيىمدى تەتىكتەردى ەنگىزۋى دەسەك تە بولاتىن شىعار. جالپى، تىركەۋ ماسەلەسى 1993-جىلدان بەرى زاڭنامادا بار. ەڭ باستىسى كوزدەلىپ وتىرعان نورمالار ءماجىلىس قابىرعاسىندا پىسىقتاۋعا جاتادى»، - دەدى ج. جاراسوۆ.
ونىڭ اتاپ وتۋىنشە، ەڭ باستىسى ەكسترەميزم مەن تەرروريزمگە قارسى ءىس-قيمىلعا قاتىسى بار زاڭنامانىڭ بارلىق نورمالارى شىن مانىندە ونى جۇزەگە اسىرۋ ءۇشىن ءتيىمدى ءارى ناقتى بولۋى قاجەت. سول كەزدە عانا ەلدىڭ دە، ازاماتتاردىڭ دا قاۋىپسىزدىگى قامتاماسىز ەتىلەدى.
سونىمەن قاتار ج. جاراسوۆ قارۋ-جاراقتى ساقتاۋ جانە ساتۋ ءتارتىبىن قاتاڭداتۋعا باعىتتالعان وزگەرتۋلەرگە دە توقتالدى. ونىڭ سوزىنە قاراعاندا، بۇل نورمالار قوعام قاۋىپسىزدىگىن قامتاماماسىز ەتۋدى كوزدەيدى.
«لاڭكەستەرگە ازاماتتىق جانە قىزمەتتىك قارۋ-جاراق اينالىمى ەرەجەسىنىڭ قانداي دا ءبىر وسال تۇسىن پايدالانۋىنا جول بەرمەۋ قاجەت»، - دەدى ماجىلىسمەن.
اۆتور: مارلان جيەمباي
