ءماجىلىس دەپۋتاتى مۇعالىمدەردىڭ جالاقىسىن مىڭ دوللارعا كوتەرۋدى سۇرادى

استانا. قازاقپارات - پارلامەنت ءماجىلىسىنىڭ وتىرىسى بارىسىندا دەپۋتات يرينا سميرنوۆا ءبىلىم بەرۋ سالاسىن قارجىلاندىرۋ ماسەلەسىن كوتەرىپ، قازاقستاندىق مۇعالىمدەردىڭ جالاقىسى تىم از ەكەنىن جەتكىزدى.

حالىق قالاۋلىسى سونىڭ ءبارىن دەپۋتاتتىق ساۋالدا كورسەتىپ، ونى ۇكىمەت باسشىسىنىڭ اتىنا جولدادى، دەپ حابارلايدى Baq.kz.

دەپۋتاتتىڭ ايتۋىنشا، بۇگىندە دانيا، يسلانديا جانە تاعى باسقا ەۋروپا مەملەكەتتەرىندە ءبىلىم بەرۋ سالاسىن قارجىلاندىرۋ كولەمى ىشكى جالپى ونىمگە شاققاندا 6-9 پايىزدى قۇراپ وتىر. سونىڭ ناتيجەسىندە گەرمانيا سياقتى ەلدە مۇعالىمدەردىڭ جالاقىسى 4 مىڭ ەۋروعا دەيىن جەتەدى. كورشى قىتايدا مەكتەپ مۇعالىمدەرى، كەم دەگەندە، 1 مىڭ ا ق ش دوللارىن الادى.

«بىزدە بولسا، مۇعالىمدەردىڭ ەڭبەكاقىسى 40-50 مىڭ تەڭگەنى قۇرايدى. كلاسس جەتەكشىلىگى ءۇشىن 5 اق مىڭ قوسادى. ونداي جۇيەمەن ءبىلىم بەرۋ سالاسىن دامىتۋ قيىن. قازاقستان دا ءبىلىم بەرۋ سالاسىن قارجىلاندىرۋ كولەمىن ىشكى جالپى ونىمگە شاققاندا 6-9 پايىزعا دەيىن جەتكىزۋى ءتيىس»، - دەيدى دەپۋتات سميرنوۆا.

ايتا كەتەيىك، وتىرىستا دەپۋتات زاعيپا باليەۆا «كوبەلەك» پەن «حرۋستالدى» بالالاردىڭ پروبلەماسىن كوتەردى. ونىڭ ايتۋىنشا، بۇگىندە ونداي بالالاردى ەمدەۋگە قاجەتتى ەم-دوم مەملەكەتتىك رەەسترگە كىرمەيدى. سونىڭ سالدارىنان ولاردىڭ اتا-اتانالارى شەتەلگە بارىپ، قىرۋار شىعىن شىعارۋعا ءماجبۇر.