قازاقستاندا ايىپپۇل جانە كوممۋنالدىق تولەم بويىنشا قارىز نەسيە تاريحىنا ەندىرىلمەك

الماتى. قازاقپارات - قازاقستاندىقتاردىڭ كوممۋنالدىق تولەمدەر جانە ايپپۇلدار بويىنشا قارىزى نەسيە تاريحىنا ەنگىزىلەتىن بولادى.

بۇل تۋرالى «پەرۆوە كرەديتنوە بيۋرو» (پ ك ب) ج ش س ديرەكتورى اسەم نۇرعاليەۆا ايتتى.

«قارىز الۋشىنىڭ بارلىق مىندەتتەمەسى ونىڭ نەسيە تاريحىندا كورسەتىلەدى. ياعني، كەز كەلگەن نەسيە بويىنشا بانكپەن، ءيا بولماسا ميكروقارجىلىق ۇيىممەن جاسالعان كەلىسىم، نەسيە تاريحىڭىزدا تۇرادى»، - دەدى اسەم نۇرعاليەۆا.

ونىڭ ايتۋىنشا، نەسيە بيۋرولارىنىڭ الەمدىك تاجىريبەسىندە قارىز الۋشىنىڭ دەبيتورلىق بورىشى تۋرالى ماعلۇماتتار جيناقتاۋ بار.

«ءتىپتى، اكىمشىمىلىك ايپپۇلدار دا ماسەلەن جول ەرەجەسىن بۇزعانىڭىز تۋرالى سىزگە اكىمشىلىك حاتتاما تولتىراتىن بولسا، ول دا ءسىزدىڭ تولەم قابىلەتەڭىز تۋرالى تاريحىڭىزعا ەندىرىلەدى. ەگەر ءسىز ۇلگىلى تولەۋشى، ياعني نەسيەڭىزدى كەشىكتىرمەي، ايپپۇلداردى دا مەرزىمىندە وتەيتىن بولساڭىز، بۇل ءسىزدىڭ قارجىلىق قابىلەتىڭىزدىڭ ارتىقتىعىن كورسەتىپ تۇراتىن بولادى»، - دەدى ول.

اسەم نۇرعاليەۆانىڭ ايتۋىنشا، «پەرۆوە كرەديتنوە بيۋرو» (پ ك ب) ج ش س بازاسىندا كوممۋنالدىق تولەمدەر بويىنشا قارىزدانىپ قالعانداردىڭ دا ەسىمدەرى ساقتالاتىن بولادى.

«ازىرگە بۇل قالىپتاسپاعان جۇيە، ءبىراق كەز كەلگەن قارىز ادامنىڭ قارجىلىق جاعدايىن كورسەتەدى. سوندىقتان، قارجى ينستيتۋتتارى ءۇشىن نەسيە الۋشىنىڭ دەبيتورلىق قارىزدارى تۋرالى اقپاراتى بولعانى دۇرىس. Doeingbusiness جۇيەسى بويىنشا قازاقستاندى دامىتۋ تۋرالى جاسالعان قۇجاتتىڭ ءبىر تاراۋىندا وسى ماسەلە قامتىلعان. مۇنى ۇيىمداستىرۋدىڭ تەحنيكالىق ماسەلەلەرى بار، الداعى 3-4 جىلدا بۇل باستاما جۇزەگە اسادى»، - دەدى ج ش س ديرەكتورى.

بۇگىن حالىقارالىق نەسيە بيۋروسى كۇنىنە وراي پ ك ب الەۋمەتتىك اكسيا اياسىندا قازاقستاندىقتاردىڭ نەسيەلىك ەسەبىن تەگىن بەرە الادى.

اۆتور: الماس مۇقاش ۇلى