مەشىتتەگى ۋاعىز تەك قازاق تىلىندە بولۋى ءتيىس - مۇحتار تايجان

استانا. قازاقپارات - مەشىتتەگى ۋاعىز تەك قازاق تىلىندە بولۋى ءتيىس. بۇل تۋرالى بۇگىن ەلوردادا ءوتىپ جاتقان «قازىرگى كەزەڭدەگى ەكسترەميزم مەن تەرروريزمنىڭ الدىن الۋ مەن جولىن كەسۋدىڭ زاڭنامالىق جانە ينستيتۋتسيونالدىق شارالارى» تاقىرىبىنداعى دوڭگەلەك ۇستەل وتىرىسىندا «بولاتحان تايجان» قورىنىڭ پرەزيدەنتى مۇحتار تايجان ءمالىم ەتتى.

«مەنىڭشە، ەكسترەميزم مەن لاڭكەستىكتىڭ باستى سەبەبى - كەدەيشىلىك پەن جۇمىسسىزدىق. سوندىقتان وسىندا وتىرعان ۇكىمەت مۇشەلەرىنىڭ جاۋاپكەرشىلىگى زور دەپ بىلەمىن. كوممۋنيكاتسيالىق ساياسات باسقاشا بولۋى قاجەت. ەلىمىزدە كەدەيشىلىك، جۇمىسسىزدىق بولماۋى ءتيىس. ويتكەنى ەلىمىز باي. ەلىمىزدە 17-اق ميلليون ادام بار. قازىرگى دۇنيەجۇزىلىك احۋال وزگەرىپ كەتتى. سوندىقتان ءبىز ۇكىمەتتەن باسقا ەكونوميكالىق ساياسات كۇتىپ وتىرمىز»، - دەدى ول.

م. تايجان اتالعان قاۋىپ- قاتەردىڭ ەكىنشى نەگىزگى سەبەبى ءبىلىم جۇيەسىندەگى ولقىلىقتار دەگەن ويىن ءبىلدىردى.

 «مەنىڭشە، وسى 20 جىلدىڭ ىشىندە، وكىنىشكە وراي، ءبىلىم جۇيەسى ءالسىز بولىپ كەتتى. بۇل سالادا دا ۇلكەن رەفورما كەرەك دەپ ويلايمىن. كەلەسى ەكسترەميزم مەن لاڭكەستىك سەبەبى - مەملەكەتتىڭ ادىلەتتىلىگى. قاتەلەسپەسەم، پلاتون «مەملەكەتتە ادىلدىك بولماسا، وندا ول مەملەكەت قۇريدى» دەگەن ەدى. سوندىقتان ءبىزدىڭ ەلىمىزدە ادىلەتتىلىك وتە جوعارى دەڭگەيدە بولۋى كەرەك. ادىلەتتىلىك جوعارى قۇندىلىققا اينالۋى ءتيىس»، - دەدى قور پرەزيدەنتى.

 سونىمەن قاتار ول جاڭادان قۇرىلعان ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ جوعارىداعى ماسەلەلەرگە قاتىستى پىكىرىن تەك ورىس تىلىندە عانا ەمەس، قازاقشا دا ءبىلدىرۋ كەرەك دەپ ەسەپتەيتىندىگىن ايتتى. «ويتكەنى، جاستاردىڭ باسىم كوپشىلىگى قازاق ءتىلدى. بۇگىنگى جاستار ءسىزدى تۇسىنبەيدى. ءسىزدىڭ مەشىتتەردەگى ۋاعىز ورىس تىلىندە بولۋى كەرەك دەگەن ءسوزىڭىزدى قولدامايمىن. مەشىتكە باراتىن جاماعاتتىڭ 99 پايىزى قازاقتىلدى ازاماتتار»، - دەدى ول مينيسترگە قاراتا.

اۆتور: مارلان جيەمباي