وليمپيادا ويىندارىندا ستريپتيز ۇيىمداستىرعان موڭعول باپكەرلەرى سپورتتان كەتۋگە ءماجبۇر بولدى

استانا. قازاقپارات - موڭعول باپكەرلەرى ريو- دە- جانەيروداعى وليمپيادا ويىندارىندا ءوز پالۋانىنىڭ جەڭىلگەنىنە نارازىلىق ءبىلدىرىپ، بوز كىلەم ۇستىندە شەشىنگەندەرى ءۇشىن 2019 -جىلدىڭ تامىزىنا دەيىن حالىقارالىق جارىستاردان شەتتەتىلدى.

 وقيعا 64 ك گ دەيىنگى سالماق دارەجەسىندە وزبەك يحتييەر ناۆرۋزوۆ پەن موڭعول مانداحناران گانزوريگ ءۇشىنشى ورىن ءۇشىن تالاسقاندا ورىن الدى. جەكپە- جەكتە موڭعول پالۋانى جەڭىسكە جاقىن بولعان، الايدا سوڭىنا قاراي تورەشىلەر بەلدەسۋدەن قاشقاقتاعانى ءۇشىن ايىپ ۇپاي بەرىپ، ول ۇتىلىپ قالدى. تورەشىلەردىڭ بۇل شەشىمى موڭعول باپكەرلەرىنىڭ نارازىلىعىن تۋدىردى. ولار اشۋعا بۋلىعىپ، بوز كىلەمگە شىعىپ، سول جەردە شەشىنە باستاعان.

 باپكەرلەردىڭ شەتتەتىلگەنىنەن بولەك، موڭعوليانىڭ كۇرەس فەدەراتسياسىنا شامامەن $ 50 مىڭ ايىپپۇل سالىندى، دەپ جازدى championat.com.