سلاۆيان ايەلدەرى كۇزدى وزەن جاعاسىندا قارسى الادى

استانا. قازاقپارات - جومارت كۇز وزىمەن بىرگە مولشىلىق پەن بايلىق الا كەلەدى. جۇرتشىلىق جازدا ءۇش اي بويى تەر توگىپ، باعىپ- كۇتكەن باقشاسىنىڭ ەگىنىن جيىپ، قۋانىشتى ءساتتى قاۋىم بولىپ تويلايدى.

«ءار ەلدىڭ سالتى باسقا...» دەگەنمەن، بۇل «ەگىن مەرەكەسىن» الەمنىڭ تۇكپىر- تۇكپىرىندەگى ءتۇرلى ۇلت وكىلدەرى ءبىر ادامداي اتاپ ءوتىپ، بارشا سىيى ءۇشىن تابيعات- اناعا العىسىن جاۋدىرادى، دەپ جازادى massaget.kz.

 21 - قىركۇيەك كۇنى ءدال وسى مەرەكەنى سلاۆيان جۇرتشىلىعى تويلايدى ەكەن. بارشا الەم جۇرتشىلىعى سەكىلدى، سلاۆياندار ءۇشىن دە «ەگىن فەستيۆالى» - پىسكەن ەگىندى جيناۋمەن قوسا، وتباسى ءال- اۋقاتىنىڭ ارتۋىن تويلاۋعا ارنالعان مەرەكە. بارلىق اۋىل تۇرعىندارى ءبىر وتباسى مۇشەسىندەي بىرىگە وتىرىپ ەگىندى جيىپ، ونى قويمالارعا تاسىپ، ءداندى- داقىل، جەمىس- جيدەكتەردى تازالاپ، ىزعارلى قىسقا دايىندايدى. وسىمەن ءتۇزدىڭ جۇمىسى اياقتالادى. كوگەرىپ كوكتەم جەتكەنشە ءنار بولاتىن نەگىزگى قور جينالادى. ەگىن مەرەكەسىن سلاۆياندار قۇداي- اناعا (جەر- انا) العىس ءبىلدىرۋ ارقىلى اتاپ وتەدى. ولاردىڭ سەنىمى بويىنشا قۇداي- انا اۋىل شارۋاشىلىعىن، وتباسىن، اسىرەسە انالاردى قورعايدى جانە اماندىق- ساۋلىق بەرەدى.

«وسەنينا» دەپ اتالاتىن بۇل مەيرام اتى ايتىپ تۇرعانداي سلاۆياندار تىلىندەگى «وسەن» سوزىنەن تۋىنداعىن. اسىعا كۇتكەن ايتۋلى وقيعانى شىعىس سلاۆياندارى ءوز تانىم- تۇسىنىكتەرىنە ساي ەرەكشە سالتتارمەن تويلايدى.

مىسالى، بۇل كۇنى بارلىق ۇيلەردە «وت جاعۋ» سالتى ورىندالادى. سول وتتىڭ قىزۋىنا جىلىنىپ، جانىپ جاتقان اعاشتىڭ سىقىرلاعان دىبىسىن ەستي وتىرىپ، اياق باسقالى تۇرعان سۋىق مەزگىلگە ىشتەي دايىندالادى. ال، سول كۇنى اۋىلداعى ايەلدەر قاۋىمى تاڭ سارىدەن تۇرىپ، «وسەنينانى» وزەن جاعاسىندا قارسى الادى. «ايەلدەردىڭ قۇرمەت كورسەتۋى» اتالاتىن ءداستۇر بويىنشا جاعادا جيىلعانداردىڭ ىشىندەگى جاسى ۇلكەنى سۇلىدان پىسىرىلگەن ناندى اينالاسىندا ءان سالىپ تۇرعان جاس ايەلدەردىڭ سانىنا قاراي ءبولىپ، ونىمەن ءۇي جانۋارلارىن قورەكتەندىرەتىن بولعان.

ەندى ءبىر قىزىقتى سالت «جاس جۇبايلارعا قوناققا بارۋ» دەپ اتالادى. ەگىن مەرەكەسى كۇنى جاس جۇبايلاردىڭ بارلىق تۋما- تۋىس، دوس- جاراندارى جينالىپ، ولاردىڭ تۇرمىسىن كورىپ، كەڭەس بەرۋ ماقساتىندا قوناققا بارادى. الدىمەن، ايەل ادام ءۇي ىشىندەگى جاعدايىن كورسەتسە، كەيىن ەر ادام اۋلاسى مەن قورا- قوپسىسىنا كىرگىزىپ، ءوزىنىڭ وتباسىلىق ءومىرى ورىندى جۇرگىزىلىپ جاتقانىن پاش ەتەدى. كەيىن، بارشا قوناققا ءوز اۋلاسىندا داستارحان جايىپ، سىرا ۇسىنۋ ارقىلى قۇرمەتىن بىلدىرەدى. ەگىن مول بولىپ، شەكسىز بايلىققا كەنەلگەن جاعدايدا بۇل مەرەكە ءتىپتى اپتالاپ تويلانادى ەكەن.

جالپى، سلاۆيان حالقى «وسەنينا» مەرەكەسىن ءۇش رەت تويلايدى،  «ءبىرىنشى وسەنينا» قىركۇيەك ايىنىڭ 14 - جۇلدىزىندا بولسا، كۇزدى ەكىنشى رەت قارسى الۋ، اتاپ وتكەندەي 21 - كۇنى، ال سوڭعىسى وسى ايدىڭ 27 -جۇلدىزىندا بولادى.

كەش باتا بارشا قاۋىم ءبىر داستارحان باسىنا جيىلىپ، ءتاتتى دامنەن اۋىز ءتيىپ، تاڭ اتقانشا ءان سالىپ، بي بيلەۋ ارقىلى قارىم- قاتىناستى نىعايتادى.

اۆتور: قانات مامەتقازى ۇلى