كاسىبي بوكسقا اۋىسۋى مۇمكىن قازاقستاندىق بوكسشىلار كىمدەر؟ - فوتو

استانا. قازاقپارات - قازاق بوكسى قاشان دا بيىگىنەن قۇلدىراعان ەمەس. مۇنى اۋەسقوي بوكستا دا، كاسىپقوي بوكستا دا دالەلدەپ كەلەدى.

كەز كەلگەن سپورت ءتۇرى سەكىلدى بوكستا دا بۋىن الماسۋ مەن جاس تالانتتاردىڭ قاتارعا قوسىلۋ كەزەڭى بولارى ءسوزسىز.

ولاي بولسا، الداعى ۋاقىتتا كاسىپقوي شارشى الاڭعا اۋىسۋى مۇمكىن بوكسشىلار تۋرالى ايتا وتىرايىق دەپ جازادى ماسساگەت.

كەيىنگى جىلدارى قازاقتىڭ دا كۇرزى جۇدىرىقتى جىگىتتەرىنىڭ ءبىرازى كاسىپقوي بوكسقا اۋىسا باستادى. جىل ساناپ سانى ارتىپ كەلەدى. بۇل - قۋانتارلىق جاعداي. الدى گەننادي گولوۆكين بولسا، ودان كەيىن جولىن جالعاپ كەلە جاتقان قانات يسلام، يسا اقبەربايەۆ، بەكمان سويلىبايەۆ، باحتيار ەيۋبوۆ، باتىر جۇكەمبايەۆ، جانقوش تۇراروۆ، ت. ب. شارشى الاڭدا شاشاسىنا شاڭ جۇقتىرماي كەلەدى.

بۇل جىگىتتەردىڭ دە ءىزىن باسىپ كەلە جاتقان جاس تالانتتار دا جەتەرلىك. الدا ولاردىڭ لەگى تاعى تولىعارى داۋسىز. اسىرەسە، ريوداعى وليمپيادا ويىندارىنان ۇلتتىق قۇراما ساپىندا وزگەرىستەر ورىن الىپ، كەي بوكسشىلار كاسىپقوي بوكسقا اۋىسۋى بەك مۇمكىن.

ۆاسيلي ليەۆيت

91 كەلىگە دەيىنگى سالماقتا ريو وليمپياداسىنىڭ كۇمىس جۇلدەگەرى اتانعان ۆاسيلي ليەۆيتتى كاسىپقوي بوكستىڭ شارشى الاڭىنان كورىپ قالۋىمىز عاجاپ ەمەس. برازيلياداعى دودانىڭ فينالىنان كەيىن قازاقستاندىق بوكسشىنى الەم تاني ءتۇسىپ، سپورت ساڭلاقتارىنىڭ نازارىن اۋداردى. اتاقتى امەريكالىق پروموۋتەر ەل حەيموننىڭ ۇسىنىس جاساۋى مۇمكىن ەكەندىگى دە ايتىلدى.

ۆاسيلي ليەۆيت 28 جاستا. كاسىپقوي بوكسقا جاسى مەن تاجىريبەسى سۇرانىپ-اق تۇر. ريو وليمپياداسى مەن «Astana Arlans» ساپىنداعى شەبەرلىگىن باعالاعان سپورت ماماندارى وتانداسىمىزدى ناعىز كاسىپقوي بوكسقا دايىن تۇلعا رەتىندە باعالاۋدا. ال وليمپياداعا دەيىنگى سۇقباتتارىنىڭ بىرىندە ۆاسيلي «كاسىپقوي بوكسقا جاقسى ۇسىنىستار تۇسسە، نەگە باق سىناپ كورمەسكە؟» - دەگەنى دە بار.

دانيار ەلەۋسىنوۆ

ريودا وليمپيادا چەمپيونى اتانعان دانيار ەلەۋسىنوۆتىڭ تە كاسىپقوي بوكسقا اۋىسۋى مۇمكىن ەكەنى ايتىلىپ، جازىلا باستادى. Boxing News پورتالى، اعاسى داۋرەن ەلەۋسىنوۆكە قوسىلىپ، لۋ دي بەللانىڭ قول استىندا ءوزىنىڭ كاسىپقوي بوكستاعى مانسابىن باستاۋعا نيەتتى ەكەنىن جازدى. ال بوكسشى بۇل تاقىرىپقا قاتىستى رەسمي مالىمدەمە جاساعان جوق. ورالعا بارعان ساپارىندا كاسىپقوي بوكسقا اۋىسۋ تۋرالى ۇسىنىستىڭ تۇسكەنىن، ءالى ناقتى شەشىم قابىلداماعانىن ايتتى.

ۇلتتىق قۇراما كاپيتانى اۋەسقوي بوكستا تالاي بەلەستەردى باعىندىردى. دانيار حالىقارالىق جارىستاردى قوسپاعاندا، ازيا، الەم جانە وليمپيادا چەمپيونى اتاندى. بالكىم، كەلەر جەتىستىگى مەن جەڭىسى كاسىپقوي بوكستا بولار...

ادىلبەك نيازىمبەتوۆ

وليمپيادا ويىندارى اياقتالعاننان كەيىن مانسابىنان بولەك، جەكە ومىرىنە كوپ كوڭىل ءبولۋدى كوزدەگەن ادىلبەكتى دە كاسىپقوي بوكستان كورىپ قالۋىمىز مۇمكىن. دەگەنمەن بۇل بوكسشى دا تۇسكەن ۇسىنىستارعا قارايتىنى انىق.

- كەلەسى وليمپياداعا قاتىسۋ تۋرالى شەشىم قابىلداعان جوقپىن. جەتىستىك بار، جەتپەگەنىنە تاعى ۇمتىلۋ كەرەك. ءبىراز تىنىققاننان كەيىن، جاتتىقتىرۋشىممەن كەڭەسىپ كورەتىن بولامىن. كاسىپقوي بوكسقا اۋىسۋ تۋرالى دا ءالى ويلانعىن جوقپىن، - دەدى بوكسشى ريوداعى دودادان كەيىنگى سۇقباتتارىنىڭ بىرىندە.

يۆان دىچكو

اسا اۋىر سالماقتا جۇدىرىقتاساتىن قازاقستاندىق بوكسشى يۆان دىچكو دا كاسىپقوي بوكستان ۇسىنىستار ءتۇسىپ جاتسا، كەتارى ەمەس. جاقىن كۇندەرى جاتتىعۋىن باستايتىن وتانداسىمىز قانداي شەشىم قابىلدايتىنى ازىرگە بەلگىسىز. بالكىم، توكيودا توپ جارۋدى كوزدەۋى دە مۇمكىن...

مەيىرىم نۇرسۇلتانوۆ

«Astana Arlans» كلۋبى ساپىندا 2013-جىلدان بەرى جۇدىرىقتاسىپ كەلە جاتقان مەيىرىم ءوزىن سان قىرىنان تانىتتى. تالاي قاۋقارلى قارسىلاستارىن قاپى قالدىرىپ، كومانداسىنا ماڭىزدى ۇپاي سىيلادى. دەگەنمەن ۇلتتىق كوماندانىڭ نەگىزگى قۇرامىنا كوپ ىلىگە العان جوق. ويتكەنى، 75 كەلىگە دەيىنگى سالماقتا جانىبەك ءالىمحان ۇلى بار.

مەيىرىم نۇرسۇلتانوۆ - ەڭبەكقور، نامىسقوي بوكسشى. ونى وسىعان دەيىنگى جەكپە-جەكتەرىنەن-اق كورىپ، بايقاپ ءجۇرمىز. بۇگىندە مەيىرىم قازاقستاندىق كاسىپقوي بوكسشىلار ماديار اشكەيەۆ جانە اسحات ۋاليحانوۆپەن بىرگە Main Event  پروموۋتەرلىگىندە جاتتىعىپ ءجۇر. بالكىم، كاسىپقوي بوكستاعى العاشقى جەكپە-جەگى كوپ كۇتتىرمەسە كەرەك.

نازىم قىزايباي

بۇگىندە قازاقستاندىق بوكسشى قىزدار دا كاسىپقوي شارشى الاڭدا باق سىناۋدى ماقسات تۇتا باستادى. ونىڭ ايقىن دالەلى رەتىندە فيرۋزا شاريپوۆانى ايتۋعا بولادى. ال ەكى دۇركىن الەم چەمپيونى نازىم قىزايباي بۇل جولدى تاڭدار ما ەكەن؟

نازىمعا تانىمال پروموۋتەر سەرگەي زاۆيلەيسكي ۇسىنىس جاساعانى تۋرالى وسىعان دەيىن اقپارات قۇرالدارىندا جازىلدى. دەگەنمەن قازاق قىزدارىنان شىققان تۇڭعىش الەم چەمپيونى وليمپيادادا باق سىناعىسى كەلەتىنى جاسىرىن ەمەس. سوندىقتان دا نازىمدى كاسىپقوي بوكستان بۇرىن، توكيودا توپ جارعانىن كورىپ قالارمىز.