الماتىلىق دارىگەرلەر شۇعىل تۇردە تاۋعا ورمەلەۋدى ۇيرەنىپ، اعىلشىن ءتىلىن جاتتاۋدا
ۋنيۆەرسياداعا كەلگەن سپورتشىلار مەن اكرەديتاتسيالانعان تۇلعالارعا مەديتسينالىق كومەك كورسەتۋ ءۇشىن اتلەتيكالىق قالاشىقتا مەديتسينالىق ورتالىق (سپورتتىق دارىگەرلەر، تراۆماتولوگ-دارىگەرلەر جانە باسقا دا ماماندار، زەرتحانالىق-دياگنوستيكالىق بلوك، يزولياتور، ءدارىحانا) پەن ساۋىقتىرۋ-وڭالتۋ ءىس-شارالارى (فيزيوتەراپيا، ل ف ك، ماسساج) ۇيىمداستىرىلاتىن بولادى. ال شۇعىل ناۋقاستار ءۇشىن ۋنيۆەرسيادانىڭ رەسمي اۋرۋحانالارىنا كەدەرگىسىز قابىلداۋ جۇمىستارى ۇيىمداستىرىلادى.
قۇتقارۋشى دارىگەرلەر تاۋ دايىندىعىنان ءوتىپ، سپورتتىق مەديتسينانىڭ جاي-جاپسارىن مەڭگەرەتىن بولادى. سونداي-اق دوپينگكە قارسى كودەكستى بىلۋگە باعىتتالعان ارنايى ترەنينگ-سەمينارلار وتكىزىلەدى.
مەديتسينالىق كومەك كورسەتۋ فاكتىلەرى اعىلشىن تىلىندە (انىقتاما كارتوچكاسى) تىركەلۋى ءتيىس بولعاندىقتان، قازىرگى ۋاقىتتا 130 دان استام مەديتسينالىق قىزمەتكەر اعىلشىن ءتىلىن دە ۇيرەنۋ ۇستىندە.
ءاربىر سپورتتىق جارىس نىسانىندا جانە اتلەتيكالىق قالاشىقتا دوپينگ-باقىلاۋ ستانسىلارى ۇيىمداستىرىلاتىن بولادى. 2017-جىلعى ۋنيۆەرسيادا ديرەكتسياسى FISU مەديتسينالىق كوميتەتىمەن بىرلەسە الماتى قالاسىندا 2017-جىلعى دۇنيەجۇزىلىك قىسقى ۋنيۆەرسيادانىڭ دوپينگ-باقىلاۋىن وتكىزۋ پروتسەدۋرالارىن ازىرلەدى.
