ستۋدەنت قىز «شىمكەنت ارۋى» اتاندى - فوتو
بۇل تۋرالى ايماقتاعى NUR. KZ ءتىلشىسى حابارلايدى.
جاس ارۋ جەڭىل ونەركاسىپ سالاسىن دامىتۋدى كوزدەيدى. سوڭعى وقىعان كىتابى اباي جولى. بالا كۇنىنەن سىلقىم بولىپ وسكەن توعجان ءبي ونەرىن دە قاتار مەڭگەرگەن.
شىمكەنتتىڭ ەڭ سۇلۋ ارۋى اتانامىن دەپ و باستا 100 دەن استام بويجەتكەن باق سىناعان. تەك ونىڭ 16 سى اقتىق سىنعا جولداما الىپ، تارتىستى باسەكەگە ونەرلەرىن پاش ەتتى.
«ميسس» اتاعىنان دامەلى ارۋلاردىڭ ەكەۋى وزگە ۇلت وكىلدەرى بولعانىمەن، بارلىعى دا وزدەرىن قازاق تىلىندە تانىستىرىپ، كورەرمەننىڭ قوشەمەتىنە بولەندى. ۇلكەن ساحناعا شىققان ۇمىتكەرلەردىڭ اراسىندا قوبالجىپ، ءتىپتى تانىستىرىلىم ءسوزىن ۇمىتىپ قالعاندارى دا بولدى. ال ساحنا ارتىندا ۇمىتكەرلەر وزدەرىن سەنىمدى ۇستاپ، ءتىپتى كەزەكتەسىپ سەلفيلەتە ءتۇستى.
قاتىسۋشىلاردىڭ توپتىق بيىمەن اشىلعان سۇلۋلىق دوداسى ءۇش كەزەڭنەن تۇردى. العاشقىسى ءوزىن-ءوزى تانىستىرۋ بولسا، ەكىنشىسى - زياتكەرلىك ءبىلىمىن انىقتاۋعا ارنالدى. بۇل كەزەڭدە ۇمىتكەرلەر قازاقتىڭ سالت-داستۇرلەرىنە قاتىستى سۇراقتارعا جاۋاپ بەردى. ال ءۇشىنشى تۋردا ءسان كيىمىنىڭ ۇلگىسى كورسەتىلدى.
قاتىسۋشىلاردىڭ ونەرىنە قازىلىق ەتكەندەردىڭ قاتارىندا ەسترادا جۇلدىزى ەركىن نۇرجانوۆ تا بار. ال شىمكەنت اكىمىنىڭ ورىنباسارى نۇرالحان كوشەروۆ ءادىل قازىلار القاسىنىڭ ءتوراعاسى بولدى. بۇل بايقاۋدا قاتىسۋشى ساليما بەيسەنعاليەۆا «كورەرمەن كوزايىمى» اتاندى. ەكىنشى ۆيتسە-ميسس اتاعىنا دايانا سادۆاكاسوۆا يە بولسا، ايىمجان فايزۋللا ءبىرىنشى ۆيتسە-ميسس اتاعىن الدى.
«شىمكەنت ارۋى-2016» تيتۋلىنىڭ يەگەرى توعجان بەكجىگىت شىمكەنتتەگى م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ 2- كۋرس ستۋدەنتى. 20 جاستاعى توعجان بۇعان دەيىن ءوزى ءبىلىم الاتىن وقۋ ورداسىندا ەڭ سۇلۋ ارۋ اتانعان. بالا كۇنىنەن بيگە قۇمار بولىپ وسكەن ول ءتىپتى ءان دە سالادى ەكەن.
ايتا كەتەيىك، «شىمكەنت ارۋى-2016» بايقاۋىنىڭ جەڭىمپازى 75 مىڭ تەڭگە كولەمىندەگى قارجىلاي سەرتيفيكات پەن رەسپۋبليكالىق «قازاقستان ارۋى-2016» دوداسىنا جولداما الدى.
«رەسپۋبليكالىق دەڭگەيدەگى جارىستا بارىمدى سالىپ، قالا تۇرعىندارىنىڭ ءۇمىتىن اقتاۋعا قولىمنان كەلگەنشە تىرىسامىن» دەگەن سۇلۋ ارۋ بۇل جەڭىسىنە الدىن الا سەنىمدى بولعانىن دا جاسىرمادى.
«وتە قۋانىشتىمىن. قولداۋ كورسەتكەن بارشالارىڭىزعا العىس ايتامىن. «شىمكەنت ارۋى» اتانعانىما ريزامىن. جەڭىسكە جەتۋ قيىنداۋ بولدى، بارىنشا تىرىستىم ءارى سەندىم»، - دەدى قۋانىشقا كەنەلگەن بويجەتكەن.
ارۋدىڭ اجەسى زاكيدا ابىل قىزى دا نەمەرەسىنىڭ جەڭىسكە جەتەتىنىنەن ءۇمىتتى بولعان.
«ەندى ءوزىمىز دايىندىعىنا قاراي ءۇمىتتى بولدىق. ۇتىپ الار دەدىك. تىلەكتەس بولىپ وتىردىق. كىشكەنتايىنان مەن باقتىم. سانگە قۇمار قىز بولىپ ءوستى. ءان ايتىپ، ءبي بيلەيتىن»، - دەپ قىسقا قايىردى «شىمكەنت ارۋى-2016» تيتۋلى يەگەرىنىڭ 70 جاستاعى اجەسى.
توعجان بەكجىگىت «قازاقستان ارۋى-2015» تيتۋلىنىڭ يەگەرى ءاليا مەرگەمبايەۆا سەكىلدى كىتاپ وقىمايتىنداردىڭ قاتارىنان ەمەس. سوڭعى رەت اباي قۇنانباي ۇلىنىڭ تۋىندىلارىن وقىپ شىققان ول شىمكەنتتىڭ تاريحىنا كەلگەندە ءبىراز كىدىرىپ قالدى. «شىمكەنت قانشا جاستا؟» دەگەن سۇراققا «1900.. .» دەپ ويلانىپ جاۋاپ بەردى باس جۇلدە يەگەرى.
ستۋدەنتتىك ءومىردىڭ ەكىنشى جىلىنا قادام باسقان ارۋدى سوگۋدىڭ دە قاجەتى جوق. ويتكەنى شىمكەنتتىڭ قۇرىلعانىنا ناقتى نەشە جىل بولعانى تۋرالى اكىمدىك ناقتى دەرەكتى بەكىتكەن جوق. بۇعان دەيىن ارحەولوگتار شاھاردىڭ 2200 جىلدىق تاريحى بار دەگەن توقتامعا كەلگەن، تەك رەسمي اقپارات جوق.
قالاداعى 47№ مەكتەپتى بىتىرگەن جەڭىمپاز ارۋ وتباسىنىڭ ورتانشى پەرزەنتى. اناسى باستاۋىش سىنىپتىڭ مۇعالىمى، اكەسى قۇرىلىسشى. اعاسى مەن ءىنىسى بار. ايتپاقشى، توعجاننىڭ اناسى گۇلميرا ناۋشابايەۆا قىزىنىڭ ءدال قازىر تۇرمىسقا شىعۋىنا قارسى ەمەس.
«بارلىعى دا اللانىڭ بۇيرىعىمەن بولادى. ءوز قالاۋىمەن بارلىق نارسە. بولىپ جاتسا، «قوي» دەمەيمىن» دەگەن ول پەرزەنتىنىڭ مودەلدىك جولدى تاڭداۋىنا قارسى ەمەستىگىن اشىپ ايتتى.
