ماقتاۋ بالاعا قالاي اسەر ەتەدى؟

استانا. قازاقپارات - كوپتەگەن دەرەكتە بالانى ءجيى ماقتاۋ ونىڭ جەتىستىككە جەتۋىنە كومەكتەسەدى، بالاعا كۇش بەرىپ، ەرىك-جىگەرىن قايراۋعا سەپتىگىن تيگىزەدى دەيدى.

ءبىراق بۇگىنگىنىڭ بالاسى ءۇشىن ماقتاۋ جانىنا مايداي جاقسا دا، كەرى اسەرىن بەرەدى. بالانىڭ ماقساتقا جەتۋى ءۇشىن ماقتاۋ ەمەس، باعىت-باعدار بەرۋ كەرەك ەكەن، دەپ جازادى massaget.kz.

«ادامنىڭ ءبىر قىزىعى بالا دەگەن» دەمەكشى، بالا - ادامنىڭ «شەديەۆرى». ونىڭ تۇلعا بولىپ قالىپتاسۋىنا اتا-انانىڭ كۇشى كەرەك، ماتەريالدىق، رۋحاني جاعىنان دا ۇنەمى قولداۋ كورسەتۋ قاجەت. ونىڭ ءار جەڭىسىنە شىن قۋانىپ، ءارى قاراي دا بيىك شىڭداردى باعىندىرۋىنا سەنگەنى ءجون. ءبىراق ءار جەڭىسىنە قۋانۋ دەگەندى وزگەگە بالانىڭ كوزىنەن تىس نە كوزىنشە اسىرا سىلتەپ ماقتاۋ كەرەك دەپ تۇسىنبەگەن ابزال.

بۇل بالانى ماقتاماۋ كەرەك دەگەن دە ءسوز ەمەس، ءار نارسە مولشەرىمەن بولعانى دۇرىس. اتا-انانىڭ وسى قاتەلىگىنەن بالا ءومىر بويى وپىق جەپ ءوتۋى مۇمكىن. بولار-بولماس دۇنيەگە ماقتاۋ ەستىپ ۇيرەنگەن بالا ۇلكەن ايدىنعا قادام باسقاندا، جىلى سوزدەردى ءجيى ەستىمەيتىنى انىق. سەبەبى، اتا-انا بالاسى جاساعان تىرلىگىنىڭ كەم-كەتىگىن تۇزەمەي، ۇنەمى وڭ باعالاپ جۇرسە، بالا «وسى جەتەدى» دەۋمەن جامان ۇيرەنەدى. سول قالپىنان تانباسا، بويعا ءسىڭىپ، العا ىلگەرىلەۋشىلىك دەگەن ۇعىمنان ادا بولادى.

ماقتاۋ بەلگىلى ءبىر كەزەڭدە كومەكتەسۋى مۇمكىن جانە عالىمدار وسىنى ءجيى ايتادى، ءبىراق بۇل بولجام عىلىمي تۇرعىدا ءالى راستالىپ ۇلگەرمەدى.

بالانى قالاي ماقتاعان دۇرىس؟

پسيحولوگ ەددي برۋممەلمان بالاعا وڭ پىكىر ايتقاندا، ماقتاعاندا پافوستى سوزدەردى ايتۋدىڭ قاجەتى جوق دەپ ەسەپتەيدى. ەگەر ءسىز بالانى اسىرا سىلتەپ ماقتاپ جاتساڭىز، اقىلدى بالا كەلەسى ماقتاۋدى ەستىمەي قالۋدان قورقاتىن بولادى، سول ماقتاۋدى ەستۋ ءۇشىن، ءسىزدى قۋانتۋ ءۇشىن %100 ماقتاۋعا لايىق ەتىپ ورىنداۋعا تىرىسادى. ال اقىلى از بالا (اقىماق دەۋدەن اۋلاقپىز) سول ايتقانعا ماساتتانىپ، تاكاپپارلىققا بوي الدىرۋى مۇمكىن.

بالانىڭ قارىم-قابىلەتىن 20 جىل زەرتتەگەن ستەنفورد ۋنيۆەرسيتەتىنىڭ پروفەسسورى كەرول دۆەك ءبىرشاما ناتيجەگە كوز جەتكىزگەن. اتاپ ايتساق، قابىلەتتى بالانى قولداۋ مەن قيىن ءىستى ءبىتىرۋ ءۇشىن تىرىسقان بالانى ماقتاۋ تۋرالى تاجىريبە وتكىزگەن ەكەن. جاساعان جۇمىسى ءۇشىن نەمەسە اقىلى ءۇشىن ماقتاۋ ەستىگەن بالالار اراسىندا ايتارلىقتاي ايىرماشىلىق بولادى ەكەن.

اقىلدى بالالار قولىنان كەلەتىن ءىستى عانا جاساپ، ۋاقىتتى ۇنەمدەگەن. ال باسقالارى الدىنا بەرىلگەن تاپسىرمانىڭ ءبارىن جاساۋ ءۇشىن تىرىسقان. ءبىراق الدىڭعى توپ 100 پايىز تولىق ءارى دۇرىس ورىنداعان، ال سوڭعىسى شالا ورىنداعان ەكەن.

دۆەك بالانى ماقتاۋدا ساقتىقپەن قاراعان ءجون دەپ ەسەپتەيدى. بالانى جاساعان جۇمىس ءۇشىن ەمەس، سول ءىستى جاساۋعا بەل بۋعانى ءۇشىن، تىرىسقانى ءۇشىن ماقتاۋ كەرەك دەيدى.

ارينە، بۇل ايتىلعانداردىڭ بارلىعى بالانىڭ جاسىنا تىكەلەي بايلانىستى. مەكتەپ جاسىنا دەيىنگى بالانى ماقتاۋ ارتىق ەتپەيدى، كەرىسىنشە كومەكتەسەدى. ال ودان ۇلكەندەرگە ماقتاۋ ايتاردا بايقاعان ءجون. دجەننيفەر حەندەرلونگ كورپۋس ەسىمدى پسيحولوگ 9-11 جاس ارالىعىندا مەكتەپ وقۋشىلارىنا ءارتۇرلى تاپسىرما بەرگەن ەكەن. ولاردىڭ كەيبىرىنىڭ مىنەزىن، كەيبىرىنىڭ قىلىعىن، ەندى بىرەۋىنىڭ تاپسىرمانى ورىنداۋىن ماقتاسا، كەيبىرىن مۇلدەم ماقتاماعان. سودان سوڭ، ەشقايسىسى ورىنداي المايتىن تاپسىرما بەرگەن، ولاردىڭ العان اسەرلەرىن تەكسەرگەن ەكەن. مىنەزى مەن قىلىعى ءۇشىن ماقتاۋ ەستىگەن بالالار قيىن تاپسىرمانى ورىنداي الماعانى ءۇشىن قاتتى رەنجىپ، ساتسىزدىكتەرىنە مۇڭايىپ قالعان. ال الدىڭعى تاپسىرمانى ورىنداۋعا تىرىسقان نەمەسە دۇرىس ورىنداعان بالالار قيىن تاپسىرمانى قاتەسىز ورىنداعانعا دەيىن تاپجىلماعان.

دەمەك، بالانى ورىنسىز ماقتاۋ كەلەسى ءبىر ساتسىزدىگىندە ساعىن سىندىرۋى مۇمكىن. جەتىستىگىن ءوز كوزىمەن كورىپ، سەزىنگەن بالانى قولداساڭىز، كەلەسىدە ءوز كۇشىنە سەنىپ، قالاي دا جەتىستىككە جەتۋگە تىرىسادى.

جالپى، كىشكەنتايىڭىزدا ماقتاۋ ەستىگەندە قانداي اسەردە بولاتىنسىز؟ ال ەسەيگەندە شە؟