بيىل «التىن دوپ» يەگەرىن حالىقارالىق فۋتبول قاۋىمداستىقتارى وداعى انىقتامايتىن بولدى

استانا. قازاقپارات - جىل سايىن ماۋسىمنىڭ ەڭ ۇزدىك فۋتبولشىسىنا بەرىلەتىن «التىن دوپ» يەگەرىن حالىقارالىق فۋتبول قاۋىمداستىقتارى وداعى (ف ي ف ا) انىقتامايتىن بولدى.

فرانسۋزدىڭ «France Football» باسىلىمى سەرىكتەستىكتى توقتاتىپ، ءوز جوبالارىن قايتا قولدارىنا الدى، دەپ جازادى massaget.kz.

قوس تاراپ ارىپتەستىكتى جالعاستىرۋ جونىندەگى كەلىسىمگە كەلە الماعان. ناتيجەسىندە بيىلدان باستاپ ۇزدىك ويىنشىنى انىقتاۋ جاڭا جۇيەدە وتەدى. جاڭا جۇيە بولعاندا، بۇرىنعى «France Football» باسىلىمىنىڭ ەرەجەسى بويىنشا انىقتالادى. ياعني، «التىن دوپ» يەگەرىن انىقتاۋعا تەك تىلشىلەر عانا قاتىساتىن بولادى. ف ي ف ا بۇل ماراپاتتى تابىستاعان تۇستا تىلشىلەرمەن قاتار، ۇلتتىق قۇرامانىڭ باس جاتتىقتىرۋشىسى مەن كاپيتاندارى دا داۋىس بەرۋگە قاتىسقان بولاتىن.

سونداي-اق، بيىلدان باستاپ «التىن دوپقا» ۇمىتكەرلەر سانى 23 تەن 30 عا ارتىپ وتىر.

«ف ي ف ا- نىڭ التىن دوبى» - ماۋسىمنىڭ ەڭ ۇزدىك فۋتبولشىسىنا بەرىلەتىن جۇلدە بولاتىن. ماراپات 2010-جىلى «France Football» نۇسقاسى بويىنشا انىقتالاتىن «التىن دوپ» جانە «ف ي ف ا- نىڭ جىل ويىنشىسى» اتتى ەكى جۇلدەنىڭ بىرىگۋى ناتيجەسىندە پايدا بولعان ەدى. اراعا 6 جىل سالا قوس تاراپ اراسىنداعى كەلىسىمنىڭ ءجىبى ءۇزىلدى.

ايتا كەتەيىك، «France Football» - فرانسۋزدىڭ 1946-جىلدان بەرى سەيسەنبى جانە جۇما كۇندەرى شىعىپ كەلە جاتقان فۋتبول تاقىرىبىنداعى جۋرنالى. باسىلىم ماۋسىمنىڭ ۇزدىك ويىنشىسىن 1956-جىلدان بەرى انىقتاپ كەلەدى.