دۋبايدا اراب جىگىتىنە تۇرمىسقا شىققان قازاق قىزى تويىنىڭ قىزىقسىز وتكەنىنە وكىندى
ايارۋ اليمەن شەت ەل كومپانياسىندا جۇمىس ىستەپ جۇرگەندە تانىسقان. نازىك تە تالدىرماش كەلگەن قازاق قىزىنىڭ جۇرەگىن ليۆاندىق جىگىت بىردەن جاۋلاپ الادى. ايارۋعا دا كىشىپەيىل، جۋاس جىگىت ۇنايدى. ءسويتىپ ەكەۋى شاڭىراق كوتەرۋدى ۇيعارادى.
اتا-اناسى جالعىز قىزىنىڭ ومىرلىك سەرىگىن تاپقانىنا قۋاندى. ايارۋ بىرنەشە شەت ءتىلىن مەڭگەرگەن. اليمەن ول اعىلشىن تىلىندە سويلەسەدى. جاس جۇبايلاردىڭ تويى دۋبايدا ءوتتى. ايارۋعا ءبارى ۇنادى، تاماشا قالا، جاڭا وتباسى، ءبىراق قازاقتىڭ تويىنا نە جەتسىن؟
- مەنىڭ توركىنىمنەن ەڭ جاقىن دەگەن ءتورت-بەس ادام عانا باردى دۋبايعا. ءاليدىڭ اكە-شەشەسى كەزىندە جەكە بيزنەسىن جۇرگىزۋ ماقساتىندا ليۆاننان دۋبايعا كوشىپ بارعان. قازىر جەكە كاسىبى بار. بىزگە ءۇي الىپ بەردى. ءبىراق مەن دۋبايدا تۇرعىم كەلمەيدى. ويتكەنى، وندا قازاقي اتموسفەرا جوق. تويىمىز قانشا دۇبىرلەپ وتسە دە قازاقتىڭ تويىنداي بولمادى. تويىمدى دۋبايدا ەمەس، الماتى، استانا، تاراز، شىمكەنت سياقتى شاھارلاردىڭ بىرىندە جاساماعانىم-اي دەپ ءالى كۇنگە وكىنەمىن. قازاق ەلىندەگى ۇيلەنۋ تويىنىڭ ارتىقشىلىعى ەڭ الدىمەن ادام سانىنىڭ كوپتىگىندە. ءالي ەكەۋمىزدىڭ تويىمىزعا ەلۋ شاقتى قوناق قاتىستى. ال قازاقستاندا جاساسام، ەڭ از دەگەندە ەكى ءجۇز كىسى كەلەر ەدى عوي.
ەكىنشىدەن، شەت ەل ازاماتىنىڭ ۇيلەنۋ تويى بولعان سوڭ بەتاشارسىز ءوتتى، ارينە.
ۇشىنشىدەن، كۇيەۋىم ەۋروپالانعان اراب بولعان سوڭ مەنەن شىعىس ەلدەرىنە، قازاق داستۇرىنە ساي ادەپ نورمالارىن (ماسەلەن كەلىن شاي) ت. ب. ءداستۇرلى عۇرىپتاردى اتقارۋدى تالاپ ەتپەدى. قازاق ورتاسىنداعى توي جاقسى كوڭىل-كۇي، ادەمى سالت-داستۇرگە تولى. ال دۋبايدا وتكەن مەنىڭ ۇيلەنۋ تويىمدا ۇلتتىق نىشاندار اسا بايقالمادى. ارينە، كوپ سىيلىقتارعا كەنەلدىك. دەگەنمەن قازاقتىڭ تويىنا جەتپەيدى.
اقپارات قۇرالدارىنا كەيبىر قالتالى قازاقتاردىڭ ۇيلەنۋ تويلارىن دۋباي سياقتى الىس شەت ەل شاھارلارىندا وتكىزەتىنى تۋرالى ەستيمىن. باسقالار قىزىعۋى مۇمكىن. ءبىراق مەنىڭ ايتارىم، جارقىراعان شاھار، اسەم عيماراتتار بولماسا ول جاقتا قازاققا كەرەك نارسە جوق. مەنىڭ ول جاقتا تۇرعىم كەلمەي، اليمەن بىرگە قازاقستانعا كەلۋىمىزدىڭ سەبەبى وسى، - دەيدى ايارۋ.
بۇگىندە ەكى بالانىڭ اناسى اتانىپ وتىرعان ايارۋ قۇربىلارى شەت ەلگە كوشۋگە قانشا ۇگىتتەسە دە وتباسى ءۇشىن ەڭ قولايلى مەكەن قازاقستان ەكەنىن ايتتى. بالالارى ءتورت تىلدە سويلەيتىنىن ماقتان تۇتقان ايارۋ كۇيەۋىنىڭ وتباسىنداعى ءرولى تۋرالى دا ايتىپ بەردى.
«الي ەكەۋمىز ءبىر مەكەمەدە جۇمىس ىستەيمىز. ءۇي شارۋاسىن دا بىرگە ىستەيمىز. مەن تاعام ازىرلەگەندى ۇناتامىن. كەيدە ۇيگە كەش كەلسەم دە ەرتەڭگى ۇجىمداعى وتىرىس ءۇشىن ءتاتتى تاعامدار ازىرلەۋگە كىرىسەمىن. الي سونداي كەزدە ماعان تورت، بالىشتەر پىسىرۋگە كومەكتەسەدى. بىردە ءبىزدىڭ ۇجىمدا مەرەكە بولاتىن بولدى. مەن ۇيگە كەشكى 8 دەن كەتە كەلدىم. ەرتەڭگى مەرەكەگە ۇلكەن تورت جانە شىعىس تاتتىلەرىن ازىرلەمەك بولدى. الي دا «شارشادىم» دەپ، جاتا قالماي، تورتقا كەرەك مازىرلەردى ازىرلەي باستادى. ەكەۋمىز تاڭعا دەيىن ۇيىقتاماي اس ازىرلەدىك. ۇيقىمىز قانباسا دا، ەرتەسىنە ارىپتەستەرىمىزدى قۋانتتىق. ول دۋبايدا تۇرعاندا مەيرامحانا مەڭگەرۋشىسى بولعان. سوندىقتان تاعام ازىرلەۋدىڭ شەبەرى»، - دەيدى ول.
«بالالارىڭدى قاي تىلدەگى مەكتەپكە بەرەسىڭدەر؟» دەگەن سۇراققا ايارۋ بىلاي دەپ جاۋاپ بەردى. «ەكى بالام دا ءتورت تىلدە ءتۇسىنىپ، سويلەي الادى. وتباسىندا اليمەن كوبىنەسە اعىلشىنشا سويلەسەمىز. ال بالالارىمىزدى شەت تىلدەرىن تەرەڭدەتىپ وقىتاتىن مەكتەپكە بەرگىمىز كەلەدى».
اراب ازاماتىمەن شاڭىراق كوتەرگەن ايارۋ بوس ۋاقىتىندا ءىس تىگۋمەن اينالىسادى جانە كىتاپ وقىعاندى جاقسى كورەدى.
