قازاقستاندا جول ەرەجەسىن بۇزۋ بويىنشا ايىپپۇل تومەندەتىلەدى

استانا. قازاقپارات - بۇگىن ق ر ادىلەت مينيسترلىگىندە «ق ر اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا قوعامدىق تىڭداۋ ءوتتى.

شارا اياسىندا ب ا ق وكىلدەرىنە سۇحبات بەرگەن ق ر ادىلەت مينيسترلىگى زاڭناما دەپارتامەنتىنىڭ ديرەكتورى ەرلان بۇزىربايەۆتىڭ ايتۋىنشا، العاش رەت قۇقىق بۇزعانى جانە ونىڭ دەڭگەيى اۋىر بولماعان جاعدايدا قولدانىلاتىن شارا رەتىندە ەسكەرتۋدى تاجىريبەگە ەنگىزۋ قاراستىرىلۋدا. قازىردىڭ وزىندە شامامەن زاڭ بۇزۋشىلىقتاردىڭ 30 پايىزى بويىنشا ەسكەرتۋ قولدانۋ تاجىريبەسىن كەڭەيتۋ بويىنشا ۋاعدالاستىققا قول جەتكىزىلگەن.

«سونىمەن قاتار اكىمشىلىك قۇقىق بۇزۋشىلىق قارايتىن سوتتار مەن ورگاندار ءۇشىن جەڭىلدەتۋگە نەگىز بولعان جاعدايدا ايىپپۇلداردىڭ كولەمىن 30 پايىزعا دەيىن تومەندەتۋ شاراسىن قابىلداۋعا مۇمكىندىك بەرۋ ماسەلەسى قارالۋدا»، - دەدى ول.

دەپارتامەنت باسشىسىنىڭ سوزىنە قاراعاندا، بۇل زاڭ جوباسى ۇكىمەتتىك ەمەس ۇيىمدار، بيزنەس وكىلدەرى تارابىنان قىزۋ تالقىلانۋدا. اشىق جۇمىس ىستەيتىن جۇمىس توبى دا بار.

«مەملەكەتتىك ورگاندارمەن دە تالقىلاناتىن ماسەلەلەر بار. ولاردىڭ باسىم بولىگى ايىپپۇلداردى تومەندەتۋگە قاتىستى. بۇل رەتتە تومەندەتىلەتىن ايىپپۇلداردىڭ كوپشىلىگى ءى ءى م ورگاندارى جەلىسىندەگى جول پوليتسياسىنا قاتىسى بار ەكەندىگىن ايتقىم كەلەدى. بۇل بارىنشا تالقىلانىپ جاتقان ءارى ادامداردىڭ قىزىعۋشىلىعىن تۋدىرعان كودەكستەگى ماسەلەلەردىڭ ءبىرى. بۇگىنگى كۇنى ايىپپۇلداردى تومەندەتۋ بولجانىپ وتىرعان باپتاردىڭ سانى شامامەن 150 گە جەتىپ وتىر»، - دەدى ە. بۇزىربايەۆ.