تارازدا «يادرولىق قارۋسىز الەم قۇرۋ» فورۋمى وتەدى
بۇل تۋرالى اتالعان وقۋ ورنىنىڭ اقپاراتتىق-يميدجدىك قىزمەتى حابارلادى.
رەسمي دەرەكتەرگە سۇيەنسەك، سەمەي پوليگونىندا 1949-1989-جىلدارى ارالىعىندا 468 مارتە يادرولىق بومبا سىناقتان وتكىزىلگەن. 1953-جىلدىڭ 12- تامىزىندا تۇڭعىش تەرمويادرولىق قۇرىلعى، 1955-جىلى 22- قاراشادا الەمدەگى ەڭ العاشقى سۋتەگى بومباسى دا قاسيەتتى سەمەي توپىراعىندا سىناقتان ءوتىپ، 1,5 ميلليونعا جۋىق حالىق رادياتسيانىڭ قۇربانى بولعان. تاريح قويناۋىنا كىرگەن كەشەگى سەمەي پوليگونىن جابۋ تۋرالى شەشىم قابىلدانعانىنا بيىل 25 جىل. شيرەك عاسىر ارالىعىندا ءالى دە بولسا يادرولىق قارۋدىڭ قاۋپى سەيىلمەدى.
الەمدەگى الەۋەتتى، الپاۋىت ەلدەر ءالى دە بولسا، بۇدان تۇبەگەيلى باس تارتۋعا قادام باسپادى. قازاقستان يادرولىق قارۋدان ازات بولعان مەملەكەت رەتىندە بەيبىتشىلىككە ۇندەپ، يادروسىز الەم قۇرۋ ساياساتىن ناسيحاتتاپ كەلەدى. جامبىل وبلىسىنداعى جوعارى وقۋ ورىندارى ۇجىمى مەن ستۋدەنتتەرىنىڭ جانە ۇكىمەتتىك ەمەس ۇيىم وكىلدەرىنىڭ باسىن قوساتىن كەلەلى كەڭەستىڭ دە ماقساتى وسى. الەمدى ادامزاتتىڭ قاس جاۋى بولعان قارۋدان باس تارتۋعا شاقىرۋ.
جيىن بارىسىندا جالپى پلەنارلىق وتىرىس وتكىزۋ جوسپارلانعان. وندا قاتىسۋشىلار يادرولىق قارۋدى قولدانۋ جانە سىناۋ قۇرباندارىن ەسكە الىپ، قارۋسىزداندىرۋ جانە تاراتپاۋدىڭ وزەكتى ماسەلەلەرىن قارايدى جانە قاۋىپسىزدىكتى نىعايتۋ جونىندەگى ۇسىنىستار ايتىلادى دەپ جوسپارلانۋدا. فورۋمنىڭ سوڭىندا ارنايى ۇندەۋ قابىلدانادى دەپ كۇتىلۋدە.
ۇندەۋدە: «ءبىز بارشاڭىزدى ەلباسىمىزدىڭ باياندى باستاماسىنا قۇلاق ءتۇرىپ، بەيبىتشىلىككە تونگەن يادرولىق قاتەردى جويۋعا، ءبىزدىڭ ورتاق پلانەتامىزدى وركەندەتۋگە جانە ەسسىزدىكتىڭ ناعىز الاپاتىن سانالى تۇردە جەتە تۇسىنۋگە شاقىرامىز!»، - دەلىنگەن.
