قازاقستان شاحماتشىلارى رەسەيدە ءبىلىم الاتىن بولدى
جاس ماماندار شاحمات سالاسى بويىنشا رەسەي مەملەكەتتىك الەۋمەتتىك ۋنيۆەرسيتەتىندە ءبىلىم الاتىن بولدى. اتالعان ج و و- عا قازاقستان تاراپىنان 5 ادام ءوتىنىم جىبەرگەنىمەن، تەك ەكەۋى: 18 جاستاعى و ق و تۇرعىنى اسىلجان ەرەجەپوۆ پەن استانا قالاسىنىڭ 17 جاستاعى تۇرعىنى، سپورت شەبەرلىگىنە ۇمىتكەر اقجان شوپانوۆ قانا ءبىلىم ورداسى تالاپتارىن ەڭسەرە العان.
«ولار ماسكەۋدە باكالاۆريات باعدارلاماسى بويىنشا ءبىلىم الادى. بۇل - پيلوتتىق جوبا. مۇنى قازاقستان مەكتەپتەرىنە شاحماتتى ءپان رەتىندە ەنگىزۋ ءۇشىن جاساپ وتىرعان العاشقى قادام دەۋگە بولادى. بولاشاقتا ءبىز ەلىمىزدەگى ج و و- لارىنا «شاحمات جاتتىقتىرۋشىسى» ماماندىعىن وقىتۋدى ەندىرگىمىز كەلەدى. ايتا كەتەيىك، قور ەكى ستۋدەنتكە اي سايىن ستيپەنديا ءبولىپ، رەسەي مەن قازاقستان اراسىندا 4 جىل بويى ۇشاقپەن ۇشۋ قۇنىن تولەيدى. الايدا، شاكىرتاقى ولاردىڭ ساباق ۇلگەرىمىنە قاراي تولەنەدى. ولار 1- قىركۇيەكتەن باستاپ ساباققا كىرىسىپ كەتتى. وقۋدى ءتامامداعان سوڭ، اسىلجان مەن اقجان قازاقستانعا قايتىپ شاحماتتان جاتتىقتىرۋشى بولادى. بولاشاقتا ءبىزدىڭ سپورتشىلارىمىزدىڭ كاسىبي شىڭدالۋىنا ءوز ۇلەسىن قوسادى دەپ سەنەمىز»، - دەدى اتالعان قوردىڭ اتقارۋشى ديرەكتورى ايعانىم ماليشوۆا.
اتالمىش قور جاتتىقتىرۋشىلاردى وقىتۋ باعدارلاماسىن جالعاستىرماق.
«ش. ەسەنوۆ اتىنداعى قور جاتتىقتىرۋشىلاردى وقىتۋ باعدارلاماسىن جالعاستىرۋدى جوسپارلاپ وتىر. ءبىز ۇمىتكەرلەردى مولىراق تارتۋ ءۇشىن ىرىكتەۋدى بيىل قاراشا ايىندا جاريالاماقپىز. تولىعىراق اقپاراتتى yessenovfoundation.org سايتىنان الۋعا بولادى»، - دەدى قوردىڭ قوعاممەن بايلانىس ءبولىمى مامانى رومان رايفەلد.
