بايان ەسەنتايەۆا جاڭا تەلەحيكايانىڭ تۇساۋكەسەر ءراسىمىن وتكىزدى - فوتو
فيلمنىڭ باس پروديۋسەرى بايان ەسەنتايەۆا كەيىپكەرلەرمەن بىرگە ەل الدىنا شىعىپ، تۇساۋكەسەر ءراسىمىن وتكىزدى. تەلەحيكايانىڭ العاشقى ءبولىمىنىڭ الدىن الا كورسەتىلىمىنە ب ا ق وكىلدەرى، بلوگەرلەر، اكتەرلەر قۇرامى مەن ءتۇسىرىلىم توبى قاتىسقان ەدى.
بايان ماقسات قىزى ءوز سوزىندە بۇل ءوزى ەتەنە ارالاسپاعان العاشقى جوبا ەكەندىگىن اتاپ ءوتتى.
«بۇل مەن قاتىسپاعان العاشقى جوبا. سولاي بولىپ قالدى. فيلمگە وتە تاماشا اكتەرلەر تۇسكەنىن ايتقىم كەلەدى. وسى تەلەحيكايانى كورگەننەن كەيىن كوپتەگەن جانداردىڭ جۇرەگىندە مەيىرىم وتى ويانىپ، بۇل ماسەلەگە نازار اۋدارىلادى دەپ ۇمىتتەنەمىن» ، - دەيدى ەسەنتايەۆا.
«حابار» تەلەارناسىنىڭ تاپسىرىسىمەن تۇسىرىلگەن فيلم دۇنيەگە كەلمەگەن سابيىنەن ايىرىلىپ قالىپ، سونىڭ سالدارىنان قاتىگەز ءارى سۋىق ايەلگە اينالعان بيبىگۇل جايىندا اڭگىمەلەيدى. الايدا اتا- اناسىز قالعان بالالار باقىتسىز ايەلگە «انا» بولۋ باقىتىن سىيلايدى.
جەتىمدەر پروبلەماسىن ءسوز ەتكەن تەلەحيكايانىڭ رەجيسسەرى ەرنار نۇرعاليەۆ. ول بۇعان دەيىن «ماحابباتىم جۇرەگىمدە 2» ، «زاۋرە» تەلەحيكايالارىندا جۇمىس ىستەگەن.
فيلم ساۋندترەگىن «الاۋ» توبى ورىندايدى.
ايتا كەتەيىك، ەسەنتايەۆا بۇعان دەيىن دە جەتىمدەر پروبلەماسىن ءسوز ەتەتىن «عاشىق جۇرەك» فيلمى مەن ءدال وسى اتاۋمەن تەلەحيكايا تۇسىرگەن بولاتىن.
stan.kz
