اقساي قالاسى كۇنىندە الامان بايگە جەڭىمپازى اۆتوكولىك ءمىندى
ب ق و دەنە شىنىقتىرۋ جانە سپورت باسقارماسىنان تۇسكەن مالىمەتكە قاراعاندا، ءبىر اپتاعا سوزىلعان شارالار ىشىندە سپورتتىق جارىستار تارتىستى ءوتتى.
شاعىن فۋتبول، ۆەلوجارىس، باسكەتبول سايىستارىنان باسقا قازاق كۇرەسىنەن وتكەن تۋرنيرگە اقتوبە قالاسىنىڭ وكىلدەرى دە قاتىستى. مۇندا 21 پالۋاننىڭ اراسىنان ادىلبەك سەيسوۆ «وگىز پالۋان»، ال تەمىرلان كولباي «تۇيە پالۋان» اتاعىن جەڭىپ الدى. اۋدارىسپاقتان سالماق دارەجەلەرىنە قاراي نارماعامبەت يمانعازى (70 ك گ)، ءجانادىل عازيزوۆ (90 ك گ)، بەرىك مۇقاشيەۆ (+90 ك گ) توپ جارسا، كوكپاردان ءبورلى اۋدانى كومانداسى ەپتىلىك تانىتتى. زىلتەمىر كوتەرۋدەن ۆاديم سيموچەنكو ۇزدىك شىقسا، قوي كوتەرۋدەن تەمىرلان عابباسوۆ وزدى.
توپ بايگەدەن باقىعالي تاڭاتاروۆتىڭ تۇلپارى ءبىرىنشى كەلسە، الامان بايگەدە جۇماش ءىزباساروۆتىڭ سايگۇلىگى الدىنا جان سالمادى. تەڭگە ىلۋدەن ارتۋر بالپانوۆ توپ جاردى. ات بايگەسىنە اقتوبە، ماڭعىستاۋ، اتىراۋ وبلىستارىنان كەلگەن جۇيرىكتەر دە قاتىستى. جەڭىمپاز- جۇلدەگەرلەرگە ءبورلى اۋدانىنىڭ اكىمى الديار حالەلوۆ، بقو دەنە شىنىقتىرۋ جانە سپورت باسقارماسىنىڭ باسشىسى تيمۋر شاياحمەتوۆ سىيلىقتارىن تابىس ەتتى. الامان بايگەدە اتى وزعان ج. ءىزباساروۆقا اۆتوكولىك كىلتى تاپسىرىلدى.
ع. جاڭگىروۆ اتىنداعى ساياباقتا «اقسايىم - جۇرەگىمدە» اتتى مەرەكەلىك باعدارلاما قويىلىپ، ءار سالا بويىنشا ۇزدىك ماماندار ماراپاتتالدى. مەرەكەلىك كونسەرتكە «جىگىتتەر» توبى، ينديرا راسىلحان سىندى ەسترادا جۇلدىزدارى قاتىسىپ، كەش سوڭى وتشاشۋمەن تۇيىندەلدى.
ايتا كەتەيىك، اقساي قالاسىنىڭ ىرگەسى 1936 -جىلى ورال- يلەتسك تەمىر جولىنىڭ سالىنۋىنا بايلانىستى قالانعان. اۋەلى قازاقستان بولىپ اتالىپ، كەيىن 1967 -جىلى قالا مارتەبەسى اتاعىن الىپ، اقساي بولىپ وزگەرتىلگەن. الداعى جىلى قالانىڭ 50 جىلدىعى اتالىپ وتىلەتىن بولادى.
