ماسكەۋدە استانا كۇندەرى ءوتىپ جاتىر

استانا. قازاقپارات - رەسەي استاناسى ماسكەۋ قالاسىندا استانانىڭ مادەنيەت كۇندەرى اياسىندا ءبىرقاتار ىسكەرلىك جانە مادەني شارالار ءوتىپ جاتىر. ەلوردا اكىمى اسەت يسەكەشەۆ ماسكەۋ مەرى سەرگەي سوبيانينمەن كەزدەستى، دەپ حابارلايدى ەلوردا اكىمدىگىنىڭ باسپا ءسوز قىزمەتى.

سونىمەن قاتار، قوس استانانىڭ ىسكەرلىك ىنتىماقتاستىعى فورۋمى، ىسكەرلىك توپ وكىلدەرىنىڭ كەزدەسۋلەرى ۇيىمداستىرىلادى. شارالار الەمدەگى ەڭ ءىرى ەكسپوزيتسيالىق الاڭ - حالىق شارۋاشىلىعى جەتىستىكتەرى كورمەسىندە ەتنواۋىلدىڭ اشىلۋىنان باستالدى. رەسمي شاراعا ەلوردا باسشىسى اسەت يسەكەشەۆ پەن ماسكەۋ ۇكىمەتىنىڭ ءمينيسترى سەرگەي چەرەمين قاتىستى.

ەتنواۋىل اۋماعىندا بىرنەشە تاقىرىپتىق كيىز ءۇي تىگىلدى - «اق وردا»، «اڭشىنىڭ ءۇيى»، «شەبەرلەردىڭ كيىز ءۇيى»، «قولونەرشىلەر شەبەرحاناسى» جانە ت. ب. سونىمەن قاتار، كەلۋشىلەرگە ۇلتتىق تاعامدار ۇسىنىلدى.

ەتنواۋىل اۋماعىندا الداعى «ەكسپو-2017» كورمەسىنە ارنالعان پاۆيلون ورناتىلدى. ەكسپوزيتسيا ماسكەۋ ۋاقىتى بويىنشا ساعات 22:00 اشىلادى.

استانا كۇندەرى اياسىندا رەسەي استاناسىندا قالا تۇرعىندارى مەن قوناقتارىنىڭ نازارىنا قازاق حالقىنىڭ مادەنيەتىمەن تانىسۋعا مۇمكىندىك بەرەتىن كوپتەگەن ءىس-شارالار ۇيىمداستىرىلادى، ەلوردالىق تەاتر ارتىستەرى مەن تانىمال قازاقستاندىق شوۋ-بيزنەس وكىلدەرى ءوز ونەرلەرىن ورتاعا سالادى. بۇگىن مەملەكەتتىك كرەمل سارايىنىڭ ساحناسىندا قازاقستاندىق ەسترادا جۇلدىزدارىنىڭ قاتىسۋىمەن گالا-كونسەرت وتەدى. تەاتر سۇيەر قاۋىم «توميريس - ساق پاتشايىمى» قويىلىمى مەن بەينەلەۋ ونەرىنىڭ «جۋسان ءيىسى» كورمەسىن تاماشالاي الادى.

بۇدان باسقا، شارا اياسىندا ءبىرقاتار ىسكەرلىك كەزدەسۋلەر وتكىزۋ، «ماسكەۋ قالاسىنىڭ ءبىرىڭعاي گەواقپاراتتىق كەڭىستىگىن»، سپورتتىق يننوۆاتسيالىق تەحنولوگيالار جانە قۇراما كوماندالار دايىنداۋ ورتالىعىن، جول قوزعالىسىن ۇيىمداستىرۋ ورتالىعىن ارالاۋ، سونداي-اق، ماسكەۋ اۋماعىندا جارمەڭكەلەر ۇيىمداستىرۋ ەرەكشەلىكتەرىمەن تانىسۋ جوسپارلانعان.