ۇلتتىق مۋزەيگە قىتاي ءتىلىن ەنگىزەمىز - دارحان مىڭباي

استانا. قازاقپارات - استاناداعى ۇلتتىق مۋزەيگە كەلگەن قىتايلىق تۋريستەرگە ءتىل جاعىنان قيىندىق بولمايدى. ويتكەنى الداعى ۋاقىتتا قىتاي ءتىلى ەنگىزىلەدى.

بۇل تۋرالى بۇگىن ورتالىق كوممۋنيكاتسيالار قىزمەتىندە اتالعان مۋزەيدىڭ ديرەكتورى دارحان مىڭباي ايتتى، دەپ حابارلايدى BAQ.kz ءتىلشىسى.

«ۇلتتىق مۋزەيدە ەكسكۋرسيا جۇرگىزەتىن ماماندار بىرنەشە ءتىل بىلەدى. ەندى قىتاي ءتىلىن ەنگىزبەكشىمىز. ويتكەنى، قىتايدان كەلىپ، قازاقتىڭ مادەنيەتى مەن تاريحىمەن تانىسقىسى كەلەتىن تۋريستەر وتە كوپ. بۇل پروتسەسس كەلەسى جىلدان باستالادى. سول ءۇشىن قازىردەن باستاپ دايىندىق جۇرگىزۋدەمىز. بىزگە كەلەتىن تۋريستەر جەدەل، ىڭعايلى فورماتتا اقپارات الۋ كەرەك. تۇرىك تىلەتىن بىلەتىن ماماندارىمىز دا بار. سونداي-اق باسقا تىلدەردى دە قامتۋىمىز مۇمكىن»، - دەيدى دارحان مىڭباي.

ونىڭ ايتۋىنشا، مۋزەي اشىلعالى 27 مىڭ شەتەلدىك تۋريست كەلگەن. ال اقىلى تۇردە كىرگەندەردىڭ سانى 40 مىڭنان اسادى ەكەن.

«ءبىز قازىرگى تاڭدا شەتەلدىك ارىپتەستەرىمىزبەن بايلانىس ورناتۋدامىز. ەلباسىنىڭ ۇلتتىق مۋزەيدى الەمدىك مۋزەيگە اينالدىرۋ كەرەك دەگەن قويعان تاپسىرماسى بار. وسى ماقساتتى جۇزەگە اسىرۋ ءۇشىن الەمنىڭ جەتەكشى ەلدەرىنىڭ مۋزەيلەرىمەن كەلىمشارتقا وتىردىق. ول ەلدەردىڭ قاتارىندا كورەيا، قىتاي، رەسەي، فرانسيا، يتاليا ءتىپتى، ۆەتنام ەلدەرىنىڭ مۋزەيلەرى بار. جالپى، بۇل جالعاساتىن ءداستۇر. ويتكەنى ءبىزدىڭ جوسپارلارىمىز وتە كوپ. مۋزەي اشىلعالى 400277 ادام اقىلى تۇردە تولەپ كىرگەن. مۇنىڭ ىشىندە جەڭىلدىكپەن، اقىسىز كىرەتىندەردى ەسەپتەپ وتىرعان جوقپىز.

ال ۇلى وتان، اۋعان سوعىسىنىڭ ارداگەلەرى سەكىلدى تەگىن كىرەتىن ازاماتتارىمىز بار. سەبەبى، ءبىزدىڭ مۋزەيدى ناسيحاتتاي سول كىسىلەر بولادى. مۇنىڭ ءوزى ۇلكەن مادەنيەت. العا قويعان مىندەتتەرىمىز بار. بۇگىنگى كۇنگە دەيىن 27 مىڭ شەتەلدىك كەلىپتى. بۇل ءبىز ءۇشىن ۇلكەن ماقتانىش. بۇرىن ءبىزدىڭ كەيبىر مۋزەيلەر جىلىنا وسىنشا عانا ادام كەلىپ جاتاتىن. ال قازىر جاڭا كەزەڭ باستالدى. استاناعا قىزىعۋشىلىق جوعارى. شەتەلدىكتەر كەلگەن كەزدە ولارعا سايكەس قىزمەت كورسەتۋىمىز كەرەك. «100 ناقتى قادامعا» سايكەس اۋديوگيدتەرىمىز بار. ۇش تىلدە بايانداپ بەرەدى. ونلاين بيلەت الۋ جولى دا قاراستىرىلعان»، - دەيدى ۇلتتىق مۋزەي ديرەكتورى.

ايتا كەتەيىك، ۇلتتىق مۋزەي ورتالىق ازياداعى ەڭ جاس ءارى ەڭ ءىرى مۋزەي. مۋزەي «مادەني مۇرا» مەملەكەتتىك باعدارلاماسىن ىسكە اسىرۋ شەڭبەرىندە قازاقستان رەسپۋبليكاسى پرەزيدەنتى ن. ءا. نازاربايەۆتىڭ تاپسىرماسى بويىنشا قۇرىلعان.