مەملەكەت باسشىسى اۋىل شارۋاشىلىعى ونىمدەرىنىڭ ساپاسىن ارتتىرۋعا شاقىردى

تالدىقورعان. قازاقپارات - مەملەكەت باسشىسى نۇرسۇلتان نازاربايەۆ الماتى وبلىسىنا ساپارى بارىسىندا ءوڭىردىڭ بۇرىنعى ەلدەگى قىزىلشا شارۋاشىلىعىنداعى جەتەكشىلىك ءرولىن قايتا جاڭعىرتۋ بويىنشا جۇرگىزىلگەن اۋقىمدى جۇمىس بارىسىمەن تانىستى.

ەلباسىنا جەرگىلىكتى اگرارشىلاردىڭ جەتىستىگى ەسكەلدى اۋدانىندا ورنالاسقان «نام» شارۋاشىلىق قوجالىعىنىڭ جۇمىسى ارقىلى ۇسىنىلدى.

ەكى جىل بۇرىن ايتىلعان ناقتى تاپسىرمالاردى ىسكە اسىرۋ بارىسى تۋرالى وبلىس اكىمىنىڭ ورىنباسارى سەرىكجان بەسكەمپىروۆ ايتتى. بۇگىندە وڭىردە قانت قىزىلشاسىن ەگۋ الاڭى 2500 گەكتاردى قۇرايدى. اكىمنىڭ ورىنباسارى الماتى وبلىسىندا قانت قىزىلشاسىن جيناۋ ەندى باستالعانىن حابارلادى، الايدا العاشقى ناتيجەلەر كوڭىل قۋانتارلىقتاي. ءبىر ءتۇپ - 6.5-7 كەلى ءونىم بەرۋدە. بۇل وبلىس اگرارشىلارى گەكتاردان 700 تسەنتنەردەن استام ءونىم جينايدى دەگەن ءسوز. وتكەن جىلى ينۆەستورلاردىڭ ارقاسىندا توقتاپ تۇرعان كوكسۋ قانت زاۋىتى قايتا ىسكە قوسىلدى. بيىل جاڭعىرتۋ، قالپىنا كەلتىرۋ جۇمىستارى جۇرگىزىلۋدە.

بۇدان باسقا، نۇرسۇلتان نازاربايەۆ قىزىلشا مەن سويا ەگىستىكتەرىن ارالادى. ءوڭىر نوۋ-حاۋى - ەلەكتروندى جەر كارتاسىمەن تانىستى. جاڭا ەنگىزىلىم كومەگىمەن ءاربىر قازاقستاندىق ءوڭىردىڭ ەگىس الاڭدارىنىڭ جاعدايىمەن تانىسا الادى. بۇل شارۋاشىلىق قوجالىقتارىنىڭ ءوز جەر الاڭدارىن پايدالانۋدىڭ تيىمدىلىگىن باقىلاۋعا مۇمكىندىك بەرەدى.

قازاقستان پرەزيدەنتى اگروونەركاسىپتىك كەشەن باسشىلارىمەن كەزدەستى. ءوڭىردىڭ جەتەكشى فەرمەرلەرى مەن اگرارشىلارى مەملەكەت باسشىسىنا ءوز جەتىستىكتەرى جايلى ايتىپ بەردى.

«الماتى وبلىسى قانت قىزىلشاسى، جۇگەرى، الماسى ارقىلى كەڭىنەن تانىمال بولىپ كەلگەن»، - دەپ اتاپ ءوتتى نۇرسۇلتان نازاربايەۆ جۇمىس ساپارى بارىسىندا. - سوندىقتان وسى داقىلداردى ەگۋ الاڭىن ارتتىرىپ قانا قويماي، ساپاسىنا دا باسا دەن قويۋ قاجەت. رەسپۋبليكادا وتاندىق قانتتىڭ ۇلەسى نەبارى 10 پايىزدى قۇرايدى، بۇل كورسەتكىشتى ۇلعايتىپ، كوكسۋ، ەسكەلدى قانت زاۋىتتارىن جاڭعىرتۋدى جالعاستىرىپ، اقسۋ اۋدانىندا قايتا جوندەۋ جۇمىستارىن باستاۋ كەرەك».