انشىلەردىڭ كينوعا ءجيى ءتۇسۋى كاسىبي اكتەرلەردىڭ اشۋىن كەلتىردى
وتاندىق كينو يندۋسترياسىنىڭ دامۋىنا سوڭعى كەزدەرى انشىلەر دە ءجيى اتسالىسىپ ءجۇر. ەلىمىزدىڭ بەلدى تەلەارنالارىنان كورسەتىلگەن ءتۇرلى فيلمدەردە بوي كورسەتىپ جۇرگەن انشىلەردىڭ كەيبىرى كينوعا مۇلدەم ءتۇسىپ كورمەگەنى دە قۇپيا ەمەس.
قايرات نۇرتاس، سيۆي ماحمۋدي، رينات باسيتوۆ، كامشات جولدىبايەۆا، اسەم جاكەتايەۆا، اسەل ءسادۋاقاسوۆا.. . ايتا بەرسەڭ بۇل ءتىزىمدى تولىقتىرا تۇسۋگە بولادى. ماسەلەن، «تراكتورشىنىڭ ماحابباتى» فيلمىنىڭ باستى رولىنە فيلم رەجيسسەرى ءانشى كامشات جولدىبايەۆانى تاڭداعان بولاتىن. بايان بۇل ونىڭ كينو يندۋسترياداعى العاشقى قادامى ەكەنىن جانە وسى ارقىلى تاۋەكەلگە بارىپ وتىرعانىن دا جاسىرماي ايتقان. دەسە دە، اتالعان كينوكارتينا كوپشىلىك كوڭىلىنەن شىعىپ، حالىق ونى ءسۇيىپ تاماشالاعان.
انشىلەردىڭ كينو الەمىنەن كوپتەپ بوي كورسەتە باستاعانىنا نارازى اكتەرلەردىڭ ءبىرى - ساتتار ەرۋبايەۆ.
"سەن تىم بولماسا وقىساڭشى دەيمىن. كىشكەنە ءتورت جىل وقىپ، ءبىلىم السا، ءبىزدىڭ بۇل باعىت كىشكەنە داميتىن ەدى، ورنىنا كەلەر ەدى. ونداي ەمەس قوي قازىر. كىمنىڭ تانىسى بار، كىمنىڭ جولى بار سول شىعىپ جاتىر. قازىر ويلاپ تۇرساق، مي اشىپ كەتتى، شىنى كەرەك. اكتەرى كىم، ءانشىسى كىم، ءبيشىسى كىم"، - دەدى ول ءوز رەنىشىن جاسىرماي.
ونىڭ بۇل سوزدەرىن اكتەر اسىلحان تولەپوۆ تە قوشتاپ وتىر.
«دالادان كەلىپ جاتقان كىسى ءتۇسىپ جاتقاندا قارنىڭ اشادى. ونەر اكادەمياسىندا جەتى- سەگىز جىل ءبىلىم الىپ ءجۇرىپ، تەاتردا ون جىل قىزمەت ەتىپ، تۇسە الماي جۇرگەندەر كوپ. ولاردىڭ ايايسىڭ، سەبەبى ولاردىڭ ماماندىعى سول»، - دەدى ول.
اكتەر عالىم وسپانوۆ تا كينوعا ءتۇسۋ - ويىنشىق ەمەس دەگەندى العا تارتىپ وتىر. ونىڭ ايتۋىنشا، بۇل ۇلكەن ىزدەنىستى تالاپ ەتەتىن ماماندىق.
دەگەنمەن، اكتەرلىككە بەت بۇرعان انشىلەر ولاردىڭ بۇل نارازىلىقتارىن تۇسىنبەي وتىر. ماسەلەن، جاقىندا عانا رينات باسيتوۆتىڭ ءتۇسىرىپ جاتقان "ا+ا" فيلمىندە باستى ءرولدى سومداپ شىققان سەرىكبول سايلاۋبەك "كينوعا تۇسۋگە شاقىرعان سوڭ بارامىز" دەيدى.
"ءبىزدىڭ بويىمىزدا تەك انشىلىك قانا ەمەس، اكتەرلىك تە ونەرىمىز بار. ءبىر ادامنىڭ قولىنان كەلگەندى ەكىنشى ادام نەگە جاسامايدى، جاسايدى"، - دەپ قايىردى ول.
ال "ديەتا. كز" توبىنىڭ ءانشىسى جاسۇلان بازاربايەۆ ءوز پىكىرىن "بىرەۋدىڭ زاتىن قىزعانساڭ دا، اللانىڭ بەرگەن باعىن قىزعانبا" دەگەن سوزدەر ارقىلى جەتكىزدى.
