ا ق ش پوليتسەيى اتىپ تاستاعان قاراعاندىلىقتىڭ تۋىستارى ءىستى قايتا قاراۋدى تالاپ ەتپەيتىن بولدى

قاراعاندى. قازاقپارات - پورتسمۋتتا ا ق ش پوليتسەيى ستيۆەن رەنكين اتىپ ولتىرگەن كيريلل دەنياكيننىڭ تۋىستارى ءدال وسى ساقشىنىڭ قولىنان قازا تاپقان ەكىنشى قۇرباننىڭ جانۇياسىنا وتەماقى تولەنەتىنى تۋرالى حاباردى ەستىسە دە، ءىستى قايتا قاراۋدى تالاپ ەتپەيدى.

بۇل تۋرالى مارقۇم جىگىتتىڭ اناسى ەلەنا دەنياكينا مالىمدەدى.

«ەشقانداي شارا قولدانبايمىز. مەن ا ق ش- قا بارىپ قايتتىم. مەنىڭ ۇلىمدى اتقان ستيۆەن رەنكيننىڭ قولىنان قازا تاپقان ۋيليام چەمپەننىڭ وتباسىمەن كەزدەستىم. ەكىنشى رەت ادام ولىمىنە سوقتىرعان ارەكەتى ءۇشىن شىعارىلعان سوت شەشىمىن ءوز قۇلاعىممەن تىڭداپ قايتتىم. ونى اقىرى جازالاعانىنا قۋانىشتىمىن، - دەدى ە. دەنياكينا. - ماعان امەريكا زاڭناماسى بويىنشا ۇلىمنىڭ ءىسى قايتا قارالمايتىنى انىق جانە ۇعىنىقتى ەتىپ ايتىلدى.

The Guardian حابارلاۋىنشا، ۆيردجينيا شتاتىندا ورنالاسقان پورتسمۋت قالاسىنىڭ بيلىگى قايتىس بولعان ۋيليام چەپمەننىڭ وتباسىنا $ 1 ميلليون تولەۋگە دايىن ەكەنىن مالىمدەگەن.

ەكىنشى ادامدى ولتىرۋىنە بايلانىستى سوت اتالعان پوليتسەيدى 2,5 جىلعا باس بوستاندىعىنان ايىردى.

ەسكە سالا كەتەيىك، 26 جاستاعى كيريلل دەنياكين ا ق ش- قا Work and Travel  باعدارلاماسى ارقىلى بارىپ، پورتسمۋتتەگى قوناق ۇيدە اسپاز بولىپ جۇمىس ىستەگەن. 2011-جىلدىڭ 23- ساۋىرىندە ونى ۇرى ەكەن دەپ قالعان ستيۆەن رەنكين اتىپ تاستاعان. مارقۇمنىڭ دەنەسىنە 11 وق تيگەن. سوت پوليتسەيدىڭ پايداسىنا شەشىم شىعارىپ، ول قىزمەتىن ارى قاراي جالعاستىرعان بولاتىن.