فۋتبول: ورالدىڭ «اقجايىعى» بەسىنشى رەت قاتارىنان جەڭىسكە قول جەتكىزدى
Sports.kz سايتىنان الىنعان مالىمەتكە قاراعاندا، كەزەكتى تۋردا ورالدىقتار اتىراۋدا جەرگىلىكتى كوماندانى 2:1 ەسەبىمەن تىزە بۇكتىردى. ءبىرىنشى تايمدا الاڭ يەلەرىنەن رۋمىنيالىق جارتىلاي قورعاۋشى الەكساندرۋ-پاۋل كۋرتەيان قوناقتاردىڭ قاتەلىگىن ءساتتى پايدالانىپ، ەسەپ اشتى.
ماتچتىڭ ەكىنشى كەزەڭىندە «اقجايىق» قۇرامىنداعى ۋكراينالىق شابۋىلشى كونستانتين دۋدچەنكو قوس دوپتىڭ اۆتورى اتانىپ، ءوز كومانداسىنا جەڭىس اپەردى.
الدىمەن ول 61-مينۋتتا «اتىراۋدىڭ» قاقپاشىسى جاسۋر نارزيكۋلوۆتىڭ ءساتسىز قايتارعان دوبىنان كەيىن تارازى باسىن تەڭەستىردى. ال 78-مينۋتتا پاراگۆايلىق لەگيونەر فرەددي كورونەل ورتيزدىڭ ءدال پاسىنان سوڭ قاقپاشىمەن جەكەدارا شىققان ك. دۋدچەنكو ءوز مۇمكىندىگىن قالت جىبەرگەن جوق.
كەزدەسۋدەن كەيىنگى باسپا ءسوز ءماسليحاتىندا ورالدىقتاردىڭ باس باپكەرى ۆاحيد ماسۋدوۆ ءبىرىنشى تايمدا ءۇش-ءتورت مۇمكىندىكتى پايدالانباي، قورعانىستا قاتەلىككە بوي الدىرعان شاكىرتتەرى ەكىنشى كەزەڭدە بەلسەندى ويناپ، شەشۋشى ساتتەردە شەبەرلىك تانىتا بىلگەندىگىن اتاپ كورسەتتى.
ءسويتىپ «اقجايىق» وسىمەن قاتارىنان بەسىنشى جەڭىسىنە قول جەتكىزىپ، قازىرگى تاڭدا 26 ۇپايمەن «تارازدىڭ» (25 ۇپاي) الدىنا ءتۇسىپ، 11- ورىنعا كوتەرىلدى. 27 ۇپايلارى بار «جەتىسۋ» مەن «شاحتەرگە» دە قۇيرىق تىستەسىپ قالدى. دەگەنمەن تارازدىقتار بۇگىن قوستانايدا «توبىلمەن» شەبەرلىك بايقاسادى. سونداي-اق تالدىقورعاندا «جەتىسۋ» قاراعاندىنىڭ «شاحتەرىن»، ال اقتوبەدە جەرگىلىكتى كوماندا ەل چەمپيونى «استانانى» قابىلدايدى.
كەشە ءوز الاڭىندا پاۆلوداردىڭ «ەرتىسىن» 2:1 ەسەبىمەن تىزە بۇكتىرگەن الماتىنىڭ «قايراتى» 58 ۇپايمەن كوش باسىنداعى، ەكى ويىنى كەم استانالىقتارعا (59 ۇپاي) جاقىنداي ءتۇستى. ال شىمكەنتتە كوكشەتاۋدىڭ «وقجەتپەسىن» 1:0 ەسەبىمەن قاپى قالدىرعان «ورداباسى» 43 ۇپايمەن تۋرنير كەستەسىندە ءۇشىنشى ورىنعا شىقتى.
ايتا كەتەيىك، «اقجايىق» كەلەسى ويىنىن 24- قىركۇيەك كۇنى ءوز الاڭىندا «شاحتەرمەن» وتكىزەدى.
