حالىقارالىق اۋەجايعا قازاقتىڭ باتىر قىزىنىڭ اتىن بەرۋ تۋرالى باستاما قايتا كوتەرىلدى

استانا. قازاقپارات - اتىراۋ وبلىسىنىڭ استاناداعى كۇندەرى اياسىندا بەيبىتشىلىك جانە كەلىسىم سارايىندا قازاقتىڭ باتىر قىزى حيۋاز دوسپانوۆاعا ارنالىپ جارىق كورگەن «حيۋاز» اتتى كىتاپتىڭ تۇساۋكەسەرى ءوتتى، دەپ جازادى «ەگەمەن قازاقستان».

ەكىنشى دۇنيەجۇزىلىك سوعىستا ەرەكشە ەرلىك كورسەتكەن حيۋاز دوسپانوۆا تۋرالى كەيىنگى جىلدارى باسپا سوزدە از جازىلىپ جۇرگەن جوق. ءبىراق، ول تۋرالى كىتاپ جارىتىمسىز ەكەن. تۇساۋكەسەر بارىسىندا ءسوز العان بەلگىلى سىنشى، «الاش» ادەبي سىيلىعىنىڭ يەگەرى ءاليا بوپەجانوۆا حيۋاز اپامىزدىڭ عاجايىپ ەرلىكتەر كورسەتىپ ەلگە ورالعانىن، ەلگە كەلگەن سوڭ دا پارتيا قاتارىندا قىزمەت ەتكەنىن، ءبىراق ومىرىندە ەشقاشان ماقتانباعانىن، ءوزىن كورسەتۋگە ۇمتىلماعانىن باسا ايتتى. «بىزدە يدەولوگيا جوق دەيدى. جاستار كىمگە ەلىكتەيدى دەپ جاتادى. جاستار حيۋازداي اپالارىنا ەلىكتەپ وسسە بولادى دەپ ايتار ەم. بۇل كىسى كەڭەس وداعى كەزىندە ونشا ەسكەرىلمەدى. تەك تاۋەلسىزدىكتەن سوڭ عانا دوسپانوۆا ەسىمى ايتىلا باستادى. حالىق قاھارمانى اتاعى بەرىلدى» - دەگەن سىنشى اتىراۋداعى حالىقارالىق اۋەجايدى حيۋاز دوسپانوۆا اتىنا بەرىلسە ەكەن دەگەن زيالىلاردىڭ تىلەگىن جەتكىزدى. بۇل باستاما وسىدان ءتورت جىل بۇرىن كوتەرىلگەن باستاما ەكەن. ازىرگە توقتاپ تۇر.

ايتا كەتەيىك، حيۋاز قايىر قىزى سوعىس جىلدارىندا ورىستىڭ اتاقتى ۇشقىش قىزى مارينا راسكوۆانىڭ 46-گۆارديالىق تۇنگى بومبالاۋشىلار ۇشقىشتار پولكىنىڭ قۇرامىندا بولدى. «ءتۇن پەرىلەرى» دەپ اتاعان ولاردى ولتىرگەندەرگە نەمىس اسكەريلەرىنىڭ تەك قاھارماندىق كورسەتكەندەرگە عانا بەرىلەتىن تەمىر كرەست وردەنىمەن ماراپاتتالاتىنى سوعىس جىلدارىندا اڭىزعا اينالعان. جاۋ شەبىن تالقانداۋ ءۇشىن 300 مارتە اۋەدەن سوققى بەرىپ، جاۋىنگەرلىك تاپسىرمانى مۇلتىكسىز ورىنداعان. ال، «حيۋاز» اتتى كىتاپ اتىراۋ وبلىستىق مادەنيەت، مۇراعات جانە قۇجاتتاما باسقارماسىنىڭ قولداۋىمەن شىعىپ وتىر. كىتاپتى قۇراستىرعان بەلگىلى جۋرناليست - تۇرسىن قاليموۆا.