قوستانايدا ەتتى ەرەكشە ادىسپەن ساۋدالايتىن دۇكەن اشىلدى
«بيزنەستىڭ جول كارتاسى» باعدارلاماسى اياسىندا اشىلعان نىساندا تۇتىنۋشىلار ءۇشىن بارىنشا قولايلى جاعداي جاسالعان. ياعني، ساتىپ الۋشىلاردىڭ وزىنە قاجەتتى ءونىمدى تاڭداپ قانا قويماي، ەتتى مۇشەلەپ، جىلىكتەپ الۋىنا دا مۇمكىندىك بار.
دۇكەن جانىنان ەت ونىمدەرىن شىعاراتىن سەح تا ىسكە قوسىلعان. دۇكەندە بۇگىندە ەت ونىمدەرىنىڭ 28 ءتۇرى ساۋدالانادى. بولاشاقتا وعان تاعى 12 ءتۇرى قوسىلماق. ساۋدا ورنىندا شەتەلدىك ونىمگە ورىن جوق، شيكىزاتتىڭ «كوزى» - جەرگىلىكتى شارۋاشىلىقتار.
ارنايى قاساپحانادا سويىلعان مالدىڭ ەتى، مۇندا مۇزداتىلعان كۇيدە جەتكىزىلەدى. قۇجاتتارى ساقاداي ساي، ءمورى باسىلعان، ارتىق كۇمانعا ورىن جوق. ودان ءارى جىلىكتەۋ بولىمىندە، تۇتىنۋشىلاردىڭ كوز الدىندا بولشەكتەنەدى. تۇتىنۋشىلاردى تاعامعا دەگەن تالعامى ءار ءتۇرلى. كەيبىرى ءتىپتى مۇشەلەپ، جىلىكتەپ العاندى قالايدى. ولاردىڭ ءوتىنىشى دە ءاپ- ساتتە ورىندالادى.
ال دۇكەن ىشىندەگى وڭدەۋ ورنىندا تۇشپارا، وراما، شۇجىق ءتارىزدى فابريكاتتار شىعارىلادى. ءبارىن ۇيدەگىدەي تاسىلمەن ىستەيتىن سەحتىڭ كۇندىك قۋاتى - 120 كەلى. تاۋارعا تاپسىرىس بەرۋشى ونىڭ قالاي جاسالىپ جاتقانىن باقىلاي الادى. ساپا مەن تازالىق مۇنداعى باستى تالاپ.
قازىر بۇل جەردە ايىنا 14-15 توننا ەت وڭدەلىپ، ساتىلىمعا شىعادى. دۇكەنمەن بىرگە 12 ادامعا جۇمىس ورنى اشىلعان. ال «بيزنەستىڭ جول كارتاسى» باعدارلاماسى اياسىندا بيىل وبلىستا جالپى قۇنى 8,5 ميلليارد تەڭگە بولاتىن 69 جوبا قارجىلاندىرىلعان.
