جۇسىپبەكتىڭ ماعجانعا جازعان حاتى

نۇر- سۇلتان. قازاقپارات - اسا قادىرلى ماعجان! «ماعجان» دەپ ءىش تارتا ەسىمىڭدى كەلتىرىپ، وسى قازىر ءوزىڭنىڭ دىنىڭە ەنىپ، ءدالىمدى بىلدىرگىم كەلەدى.

ادەتتە ءيا كورگەنى مول كونە كوز كىسى، ءيا بولماسا اياۋشىلىعى باسىم جولداس- جورا اقىل ايتقىش؛ ءوز باسىم اقىلگويسۋدەن اۋلاقپىن. سىرىمدى ايتۋدان ءارى بارماسپىن. قازاق ادەبيەتىنىڭ كوگىنە كوتەرىلگەن كۇن سەكىلدى ءوز ساۋلەڭدى ءاردايىم سەزىنىپ، ءبىلىپ، بولجاپ وتىرۋدى ادەتكە اينالدىرعانبىز. اقىندىق - قاسيەتىڭە اينالعان. ادەبيەتىمىزگە «جارالى جان»، «قورقىت»، «بايان» سەكىلدى ءبىرتۋار ءسوز كەستەسىن بەرگەن اقىننان ءالى كۇتەرىمىز كوپ. ءوز سوڭىنان ءىزباسارلارىن ەرتىپ، كەلەشەك كوكجيەگىنە ەنتىكپەي جەتەر تالانتتى دۇنيەلەر تۋعىزۋ سەنىڭ عانا قولىڭنان كەلەر ءىس. پوەزيانىڭ قاناتتى پىراعىن ازىرشە قاباتىڭنان ۇشىراتپاي ءجۇرمىز. ەڭ عاجابى: ولەڭىڭنىڭ ءوتىرى جوق.

باز بىردە الا- قۇلالىقتى سەزىپ تىكسىنە قالاتىنىمىزدى نەسىنە جاسىرايىق؛ جىلاۋىڭ كوپ، وكسىگىڭ مول، ءوز مۇڭىنا ءوزىڭ كومىلىپ ءجۇرىپ الاتىندايسىڭ. پۋشكيندى پۋشكين ەتكەن ونىڭ ولەڭ جازعىشتىعى ەمەس، ءومىردىڭ وزگە كورمەگەن ساتتەرىن ەلدەن بۇرىن سەزە ءبىلۋى، العىر اقىلى، تىرشىلىكتەن ەڭ قاجەتتىسىن تاڭداي ءبىلۋ بالگەرلىگى سەكىلدى عوي.

قازاعىم دەپ قامىعىپ ءجۇرسىڭ. تاسپاقاشا ميمىرت جۇرسەڭ - كوپ نارسەنى قامتيسىڭ، ارعىماقشا اعىنداپ جۇيتكىپ وتكەننەن گورى سول ميمىرتتىق مازمۇندى، ماڭدايداعى كوزبەن ەمەس، كوكىرەكتەگى كوزبەن قامتىشى. جيىرماسىنشى عاسىردىڭ پەرزەنتىسىڭ.

ءوز سوزىڭمەن اتاساق «وپاسىز ءومىردىڭ»، «قاسكوي تاعدىردىڭ» زامانى تۋعان كەزدە، ادام ءوز ءومىرىنىڭ قوجاسىنا اينالىپ، جاڭا ۇمىتپەن، جارىققا، جارىلقاۋشىعا بەت بۇرعان مەزگىلدە - ءسوز دارىعان مىقتى اقىن بەيتاراپ وتىرۋعا ءتيىستى ەمەس.

بۇگىنگى كۇن قانشاما قامىققىش بولسا دا بايروننىڭ ءوزىن توڭكەرىسشىل دەپ ءجۇرمىز. توڭكەرىسشىل اقىن العا ۇرانداپ شابا بەرسىن دەۋدەن اۋلاقپىن، شىنىمدى ايتسام، كۇن ساناپ، ساعات ساناپ سەزىم شىرعالاڭىنان شىعىپ، تاقىرىپ شەڭبەرىن كەڭەيتىپ، شىننىڭ جۇزىنە تۋرا قاراپ تالانت تاعىلىمىڭىزدى جەتىلدىرە بەرۋىڭىزدى تىلەر ەدىم. تىلەۋ دەگەن جاي ءسوز عوي. وقۋشى قاۋىم اتىنان امانات ايتار ەدىم.

بىرەۋگە ويتە عوي، بۇيتە عوي دەپ ءوتىنىش ەتۋ بۇل زاماندا قالىپ بارادى، اسىرەسە اقىنعا بۇيرىق، ءوتىنىش وتپەيدى، وكتەمدىك جۇرمەيدى. ايتسە دە سەبەپسىز سالدار تۋمايدى. وسى رەتتە ءسىز بەن ءبىزدى قازەكەمنىڭ قاسيەتتى ءسوزى جاقىنداستىرا تۇسسە، ويىمىزعا وي، وتىمىزعا وت قوسا بىلسەك - ماقساتىمىزعا جاقىنداي تۇسەرىمىز بارشاعا ايان.

داڭقتىڭ دابىلكەشى بولماي- اق، ماقساتتىڭ قۇلى بولا بىلسەك جەتەدى. نە جازىپ جۇرگەنىڭىزدى بىلگىم كەلەدى.

سالەممەن سەبەپشىڭىز جۇسىپبەك ايماۋىتوۆ

1924 -جىلعى 16- مامىر

دەرەككوز: ult.kz