روزا ءالقوجا كاسىبىن تۇرالاتىپ، يدەياسىن ۇرلاعانداردى قالاي ىزدەپ تاپقان
وسىدان تۋرا ءبىر جىل بۇرىن ءانشى روزا ءالقوجا ونەردەگى ارىپتەستەرىن جيناپ جەكە كابىسىنىڭ تۇساۋىن كەسكەن بولاتىن. «مەن سىيعا تارتقان ورامال» انىمەن تانىلىپ، ەلدىڭ سۇيىكتى انشىسىنە اينالعان روزا ورامال ساتاتىن بۋتيگىنىڭ اتاۋىن دا ءدال سول انمەن بايلانىستىرعان بولاتىن. دۇكەندە قىز- كەلىنشەكتەرگە ارنالعان ورامالدار، انالارعا ارنالعان اق جاۋلىقتار، قازاقى ويۋ- ورنەك بەدەرلەنگەن باس كيىمدەر ساتىلادى.
- تانىمال ءانشى روزا ءالقوجا ورامال ساتاتىن دۇكەن اشقالى بەرى ۇرلىقتان كوز اشپاي كەلەدى. بىرەسە، كاسساسىنان قوماقتى قارجىسىن ۇپتەپ كەتسە، ال كورشى قىرعىز اعايىندارى ءتىپتى يدەياسىن ۇرلاپ، ورامالدارىن بازارلاردا ساتىپ جاتقان كورىنەدى.
«قازاقشا ويۋى بار، ءبىراق بىزدىكىنەن الدە قايدا ارزان. سوسىن باسىندا وعان تاڭ قالىپ جۇردىك. ءبىر كۇنى ونى مەنىڭ ورامالدارىم دەپ ساتا باستادى. ولار ءتىپتى باسىنا باستادى دەۋگە بولادى»، - دەيدى ءانشى روزا ءالقوجا.
بۇل جاعداي ءانشىنىڭ تەك اشۋ- ىزاسىن عانا ەمەس، ساۋداسىن دا ءبىراز شىعىنعا باتىرادى.
«ءبىز سىزدەردىكىن العانشا مىڭ جارىم تەڭگەگە كوپ ورامالدى بازاردان العانىمىز ءتيىمدى دەي باستادى كەلۋشىلەر. ءبىر دۇكەن قالدى، جۇمىسشىلارىمىزدى قىسقارتتىق، - دەيدى ءانشى.
ءوز قولىنان شىققان ورامالدارىنىڭ كوشىرمەسىن جايما بازارلاردان كورگەن ءانشى ارى- بەرى اڭىسىن اڭداپ، ونىڭ بىشكەكتەن شىعارىلىپ جاتقانىن انىقتايدى. بىلە سالىسىمەن دەرەۋ سول ەلگە اتتانادى.
«يدەيانىڭ بىزدەن ۇرلانىپ جاتقانىن ءبىلدىم. بىشكەككە ارنايى بارىپ، اياعىمنان توزىپ، بازار ارالاپ، تاپتىق»، - دەيدى ءانشى روزا ءالقوجا.
روزا وزىنەن ەش رۇقسات سۇراماي ورامالدارىنىڭ كوشىرمەسىن جاساپ، ارزان ماتالارعا ويۋ ورنەك باسىپ جۇرگەن جىگىتتى ىزدەپ تابادى.
«داۋرەن دەگەن جىگىت. ءبىز ءسىزدىڭ ورامالدارىڭىزدى باسىپ شىعارىپ جاتىرمىز. ماعان قازاقستاننان ۇسىنىس ءتۇستى وسى جەلتوقسان ايىنان باستاپ ءسىزدىڭ ورامالدارىڭىزعا ۇقساتىپ جاساپ جاتىرمىز دەدى»، - دەيدى روزا ءالقوجا.
دەگەنمەن ءانشى بۇعان جاسىمادى، كەرىسىنشە، باسەكەگە توتەپ بەرۋ ءۇشىن ورامالدارىنىڭ ءتۇرىن 80 گە ارتتىرعان. ەڭ قىمبات ورامال ەشقانداي تەحنيكانىڭ كومەگىنسىز، بوياۋمەن ورنەكتەلىپ، قولمەن جاسالعان.
«تۋ تۇستەس ورامالداردى شىعاردىق. قولدان سالىنعان سۋرەتى بار ورامالداردى جاساپ شىعاردىق»، - دەيدى ءانشى ءالقوجا.
ءانشى حالىقتىڭ وتاندىق ونىمگە دەگەن سۇرانىسىنىڭ ءالى دە بولسا ارتپاعانىنا قىنجىلادى. دەگەنمەن، ءانشى يدەياسىن ۇرلاپ، پايدا تاۋىپ جۇرگەندەردى بىلسە دە، ەشقانداي جازا قولدانباپتى.
