اۋعانستان ءورت سوندىرۋشىلەرى كوكشەتاۋدا ءبىلىم الادى

استانا. قازاقپارات - ق ر پارلامەنتى سەناتى «ق ر ۇكىمەتى مەن اۋعانستان يسلام رەسپۋبليكاسى اراسىنداعى ازاماتتىق قورعانىس، توتەنشە جاعدايلاردى الدىن الۋ جانە ولاردىڭ سالدارىن جويۋ سالاسىنداعى ىنتىماقتاستىق تۋرالى» كەلىسىمدى راتيفيكاتسيالاۋ تۋرالى زاڭ جوباسىن قابىلدادى.

«كەلىسىمگە اۋعانستان يسلام رەسپۋبليكاسى پرەزيدەنتىنىڭ قازاقستان رەسپۋبليكاسىنا رەسمي ساپارى بارىسىندا استانا قالاسىندا 2015-جىلدىڭ 20- قاراشاسىندا قول قويىلدى.

اتالعان كەلىسىمنىڭ كۇشىنە ەنۋى توتەنشە جاعدايلاردى مونيتورينگىلەۋ جانە بولجاۋ جاساۋ سالاسىندا تاجىريبەلەرمەن الماسۋ، قاۋىپ تۋىنداعان جاعدايدا تۇرعىنداردى دايىنداۋعا، ەكى مەملەكەتتىڭ وقۋ ورىندارىندا ازاماتتىق قورعاۋ سالاسىنداعى مامانداردى وقىتۋ، تۇراقتى نەگىزدە بىرلەسكەن كونفەرەنتسيالاردى، سەمينارلاردى، دايىندىقتاردى وتكىزۋ، تاراپتىڭ اۋماعىندا تۋىنداعان توتەنشە جاعدايلاردى جويۋ كەزىندە قىسقا مەرزىمدە كومەك كورسەتۋ مۇمكىندىك بەرەدى»، - دەدى ق ر ىشكى ىستەر ءمينيسترى قالمۇحامبەت قاسىموۆ سەناتتا زاڭ جوباسىن تانىستىرۋ كەزىندە.

ءمينيستردىڭ ءسوزى بويىنشا، زاڭ جوباسى ەلىمىز ءۇشىن تەرىس سالدارلارعا اكەپ سوقتىرمايدى. سونىمەن قاتار ونى قابىلداۋ تاراپتاردىڭ اۋماعىنداعى تابيعي جانە تەحنوگەندىك سيپاتتاعى توتەنشە جاعدايلاردىڭ سالدارىن ازايتۋعا ىقپال ەتەدى.

دەپۋتاتتاردىڭ ساۋالىنا جاۋاپ بەرۋ بارىسىندا مينيستر، كەلىسىم بويىنشا، اۋعانستان ماماندارىن كوكشەتاۋ تەحنيكالىق ينستيتۋتىندا ءورت قاۋىپسىزدىگى فاكۋلتەتىندە وقىتۋ جوسپارلانىپ وتىرعاندىعىن اتاپ ءوتتى. ولاردىڭ وقۋ اقىسى اۋعانستانعا حالىقارالىق ۇيىمدار بەرىپ وتىرعان ماقساتتى گرانتتار ەسەبىنەن وتەلەدى.