انا رەتىندە ءولىم جازاسىنا كەسۋدى قولدايمىن - داريعا نازاربايەۆا

استانا. قازاقپارات - ق ر پارلامەنتى سەناتىنىڭ دەپۋتاتى داريعا نازاربايەۆا ەل اراسىندا پەدوفيلدەرگە ءولىم جازاسىن تاعايىنداۋ تۋرالى ۇسىنىستارعا پىكىر ءبىلدىردى.

«انا رەتىندە مەن ونى قولدايمىن. ءبىراق حالىقارالىق كونۆەنتسيا بار، وعان بارا المايتىن شىعارمىز. ال ەندى ءومىرباقي تۇرمەگە وتىرعىزۋعا، ونداي بىزدە قۇقىعىمىز بار»، - دەدى ول تىلشىلەرگە بەرگەن سۇحباتىندا.

ونىڭ ايتۋىنشا، پەدوفيلدەردى قوعام بولىپ، ەل بولىپ، بالالارعا جولاتپاۋدى قولعا الۋ قاجەت.

«ۇكىمەت ازاماتتارعا دەگەن مەملەكەتتىك كورپاراتسيا بار. سونىڭ قۇرامىندا سونداي جۇمىستاردى باستاعانبىز. ەڭ الدىمەن پەدوفيل قىلمىسكەرلەردى تىزىمگە الىپ، باقىلاۋ، تۇرمەدەن شىققاننان كەيىن قايدا ورنالاستى، قاي جەردە جۇمىس ىستەپ ءجۇر، ولاردى بالالارعا جاقىنداتپاۋعا ءبىرتالاي جۇمىستاردى اتقارۋى ءتيىس دەپ ول جۇمىستاردى قوستىق. ارينە قوعام ولاردى قاداعالاپ وتىرۋى ءتيىس. مەكتەپتەرگە، بالاباقشالارعا جولاتپاۋ كەرەك»، - دەدى ول.

سونىمەن قاتار، د. نازاربايەۆا 6 جاسار اقتاۋلىق قىزدىڭ پسيحيكالىق اۋرۋعا شالدىققان ەر كىسىنىڭ زورلاۋ فاكتىسىنە قاتىستى دا ءوز پىكىرىن قوستى.

«ونداي ادامدار اۋرۋ دەپ سانالادى. ولاردى ەمدەۋ ءۇشىن ءبىرتالاي قارجى بولىنەدى. ولارعا پسيحوتروپتى ءدارى-دارمەكتەردى بەرىپ وتىر. اۋرۋ دەپ سانالسا، ولاردى ەمدەۋ دە كەرەك. ەندى ساۋ ادامنىڭ باسىنا ونداي وي كەلمەيدى عوي. ونداي جاڭالىقتاردى ءبىز ۇلكەن قورقىنىشپەن قابىلدايمىز. تۋعان-تۋىستارىمەن بىرگە قايعىرامىز»، - دەپ اتاپ ءوتتى ول.

اۆتور: جاسۇلان جولدىبايەۆ