داريعا نازاربايەۆا سەناتتا جاستاردى اسكەرگە كوپتەپ شاقىرتۋ ماسەلەسىن كوتەرمەك
د. نازاربايەۆا تىلشىلەرگە بەرگەن سۇحباتىندا الدىمەن جاڭا قىزمەتىنە قاتىستى پىكىرىمەن ءبولىستى.
«مەنىڭشە سەناتورلىق قىزمەت وتە جاۋاپتى ءارى قىزىق جۇمىس، مەن ءۇشىن تاڭسىق ەمەس. ءبىر قۋانتارلىعى، مەن جاڭا سالامەن اينالىساتىن بولامىن. حالىقارالىق قاتىناستار، قاۋىپسىزدىك جانە قورعانىس ماسەلەلەرى موينىمدا بولادى. الدا ءالى قىزىق جۇمىستار كۇتىپ تۇر»، - دەدى ول.
سونىمەن قاتار ول سەناتتا قانداي جۇمىستاردى ءبىرىنشى قولعا الاتىنىن ايتىپ بەردى.
«ەڭ ءبىرىنشى نەدەن باستايمىن؟! ەگەر قورعانىس تۋرالى ايتاتىن بولساق، ۇكىمەتتە ءبىز جاستاردىڭ ءىسىن كوتەرگەن بولاتىنبىز. مەكتەپ بىتىرگەن جاستار اراسىندا كوللەدجگە دە، جوعارى وقۋ ورىندارىنا دا تۇسپەيتىندەر كوپ. ولار جۇمىسسىز قالادى. وسى تۇرعىدا ستاتيستيكالىق مالىمەتتەر وتە ناشار. جىل سايىن مەكتەپ بىتىرگەن 24 مىڭعا تارتا تۇلەك ەلىمىزدىڭ نە ەكونوميكالىق، نە الەۋمەتتىك كەڭىستىگىنە ەنە الماۋدا. مەن كەلىسىمشارت بويىنشا قىزمەت اتقارىپ جۇرگەن اسكەريلەردى قىسقارتىپ، جەدەل اسكەري قىزمەتكە قابىلداناتىنداردىڭ سانىن كوبەيتۋدى كوتەرگىم كەلەدى. جاستار اسكەردە مىندەتىن اتقارۋعا مۇمكىندىك بەرۋ كەرەك. جاڭا ماماندىقتاردى مەڭگەرىپ الار ەدى»، - دەدى ول.
داريعا نازاربايەۆانىڭ ايتۋىنشا، ودان ارميا دا، مەملەكەت تە ودان ۇتادى. «كەلىسىمشارتتاعىلار بىزدە وتە كوپ. اۋىل جاستارى ءۇشىن بۇل الەۋمەتتىك ليفت بولادى. ءبىر جىلدىڭ ىشىندە بارلىعىن مەڭگەرۋ، يگەرۋ ازدىق ەتەدى. سەناتتا اسكەري مىندەت ەكى جىل بولسىن دەگەندەي سۇراقتاردى داكوتەرەمىز»، - دەدى سەناتور.
اۆتور: جاسۇلان جولدىبايەۆ
