تۇينەمە اۋرۋىنىڭ شىعۋى قاراعاندى وبلىسىنداعى قاۋىپسىزدىكپەن قامتۋدى ەسەلەي ءتۇستى

قاراعاندى. قازاقپارات - قاراعاندىدا مالدارىگەرلىك جانە ازىق-تۇلىكتىك قاۋىپسىزدىك ماسەلەلەرى بويىنشا وتكەن ايماقتىق سەمينار-جينالىسقا مىڭنان استام ادام جينالدى، دەپ حابارلادى وبلىس اكىمىنىڭ باسپا ءسوز قىزمەتى.

جينالىستا ەت ساتىلاتىن نىساندارعا جۇرگىزىلگەن تەكسەرىستەر ايتىلدى. ەكى اي ىشىندە وبلىستا 90 مالدارىگەرلىك زاڭنامانى بۇزۋ فاكتىسى انىقتالعانى جاريالاندى. تەكسەرۋشىلەردىڭ مالىمەتتەرى بويىنشا، مالدارىگەرلىك انىقتامانى راسىمدەۋدە زاڭ بۇزۋشىلىقتار ورىن العان. باقىلاۋشىلار سانيتارلىق نورمالارعا سايكەستىگى تۋرالى تاڭبانىڭ جوقتىعىن باسا ايتتى. قاجەتتى قۇجاتتارسىز ەت تاسىمالداۋ وقيعالارى دا تىركەلگەن.

كىنالىلەرگە 1,5 ميلليون تەڭگەدەن استام ايىپپۇل سالىندى.

سەمينار-جينالىستا «اۋىل شارۋاشىلىعى جانۋارلارىن سايكەستەندىرۋ» ۆەب-پورتالى تانىستىرىلدى. ازىرلەۋشىلەردىڭ ايتۋىنشا، ەلىمىزدىڭ كەز كەلگەن تۇرعىنى پورتال كومەگىمەن ەت ءونىمىنىڭ تاسىمالدانۋ جولىن قاداعالاپ، ونىڭ ۆەتەرينارلىق جاي-كۇيىنەن حابار الا الادى.

«ءبىز باعدارلاما بويىنشا جانۋاردىڭ قايدان ەكەنىن، قايدا سويىلعانىن، قاۋىپسىزدىك ءۇشىن قاجەتتى مال دارىگەرلىك قۇجاتتاردى قاشان العانىن باقىلاي الامىز»، - دەپ مالىمدەدى ق ر باس مەملەكەتتىك سانيتارلىق دارىگەر جانداربەك بەكشين.

«وبلىس بويىنشا 8 اي مەرزىمدە سانيتارلىق-ەپيدەميولوگيالىق قورىتىندىلارى جوق 160 نىسان انىقتالدى. زاڭسىزدىقتار ءۇشىن 104,5 ميلليون تەڭگەگە 2000 نان استام ايىپپۇلدار سالىندى، ونىڭ 14 ميلليوننان استامى سوت ارقىلى ءوندىرىلدى. 18 نىساننىڭ قىزمەتى ۋاقىتشا توقتاتىلدى»، - دەپ حابارلادى سانيتارلىق قىزمەت وكىلدەرى.

ايتا كەتەيىك، ماۋسىم-تامىز ايلارىندا قاراعاندى وبلىسىنىڭ شەت جانە اقتوعاي اۋداندارى تۇرعىندارىنىڭ تۇينەمە اۋرۋىن جۇقتىرۋ فاكتىسى انىقتالعان بولاتىن. سويىلعان مال اسا قاۋىپتى ينفەكتسيا كوزىنە اينالدى. تۇينەمە اۋرۋىنان ەركىندىك اۋىلىنىڭ ەكى تۇرعىنى كوز جۇمدى.