گونكونگ بيزنەسى قازاقستانداعى يننوۆاتسيالىق جوبالارعا ينۆەستيتسيا سالۋعا مۇددەلى
بۇل تۋرالى قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆتىڭ قازاقستانعا العاش رەت كەلگەن گونكونگتىڭ قارجى جونىندەگى حاتشىسى (قارجى ءمينيسترى) دجون تسانگپەن كەزدەسۋى بارىسىندا ءمالىم بولدى.
سىرتقى ساياسات ۆەدومستۆوسىنىڭ باسشىسى جۇزدەسۋ بارىسىندا قازاقستاننىڭ نەگىزگى سىرتقى ساياسي باسىمدىقتارى جانە ەلىمىزدە ينۆەستيتسيالىق كليماتتى جاقسارتۋ مەن ارنايى ەكونوميكالىق ايماقتاردى قۇرۋ ءۇشىن قولدانىلىپ جاتقان شارالار تۋرالى ايتىپ بەردى. سونىمەن قاتار، مينيستر قازاقستاندى گونكونگتىڭ قارجى يندۋسترياسىنداعى تاجىريبەسى قىزىقتىراتىنىن اتاپ ءوتتى. وسىعان بايلانىستى تاراپتار «استانا» حالىقارالىق قارجى ورتالىعى قىزمەتكەرلەرىنىڭ گونكونگ قارجى مەكەمەلەرىندە ارنايى ترەنينگتەردەن ءوتۋ مۇمكىندىگىن تالقىلادى.
ءوز كەزەگىندە دجون تسانگ گونكونگتىڭ ىسكەرلىك توپتارى قازاقستانداعى ساۋدا، لوگيستيكا جانە قىزمەت كورسەتۋ سالالارىنداعى يننوۆاتسيالىق جوبالاردى قارجىلاندىرۋعا دايىن ەكەنىن مالىمدەدى. تاراپتار قازاقستان مەن گونكونگ اراسىنداعى ينۆەستيتسيالاردى ءوزارا قورعاۋ جانە كوتەرمەلەۋ، قوسارلانعان سالىق سالۋدى بولدىرماۋ، سونداي-اق سالاارالىق جانە ۆەدومستۆوارالىق ەكى جاقتى قۇجاتتاردى قابىلداۋ ماسەلەلەرىن دە اڭگىمەگە ارقاۋ ەتتى.
