قازاقستاندىقتار بىرىككەن امىرلىكتەگى مۇلىكتەرىن جاپپاي زاڭداستىرۋدا
بۇل تۋرالى بۇگىن ق ر قارجى مينيسترلىگىنىڭ مەملەكەتتىك كىرىستەر كوميتەتى تاۋەكەلدەردى باسقارۋ، ساراپتاۋ جانە ستاتيستيكا باسقارماسى باسشىسىنىڭ ورىنباسارى ەرلان ساعىنايەۆ ءمالىم ەتتى.
«اتالعان سوماعا قازاقستان اۋماعىندا زاڭداستىرىلعان مۇلىكتىڭ 100355 نىسانى مەن سوماسى 806,7 ميلليارد تەڭگەنى قۇرايتىن قۇندى قاعازدار، سونىمەن قاتار شەتەلدەگى 129 نىسان مەن سوماسى 5,4 ميلليارد تەڭگەنى قۇرايتىن قۇندى قاعازدار كىرەدى. مۇنان بولەك، اقشالاي 1555 ميلليارد تەڭگە زاڭداستىرىلدى»، - دەدى ول.
ونىڭ مالىمەتتەرىنە سايكەس، زاڭداستىرىلۋعا ءوتىنىش بەرىلگەن مۇلىكتىڭ جالپى سوماسى 2,7 تريلليون تەڭگەنى قۇراپ وتىر. ايتا كەتەرلىگى، اكتسيا بارىسىندا 108 مىڭنان استام ازامات وكىلەتتى ورگاندارعا ءوز مۇلىكتەرىن زاڭداستىرۋ ءۇشىن جۇگىنگەن.
جوعارىدا اتاپ وتكەنىمىزدەي، قازاقستاندىقتار شەت مەملەكەتتەردەگى 129 نىسان زاڭداستىرىپ ۇلگەرگەن. قازاقستان تىسقارى اۋماقتا زاڭداستىرىلعان مۇلىكتىڭ باسىم بولىگى بىرىككەن اراب امىرلىكتەرىندە. مۇنان بولەك، ەل ازاماتتارى يسپانيا، ۇلى بريتانيا، بولگاريا، تۇركيا، رەسەي جانە وزبەكستانداعى مۇلىكتەرىن زاڭداستىرىپ العان.
اۆتور: مارلان جيەمباي
