بريتانيالىق اجەگە بالا كوتەرۋ ءۇشىن قايتىس بولعان قىزىنىڭ انالىق جاسۋشاسىن قولدانباق
ەمبريولوگيا ماسەلەسىمەن اينالىساتىن بريتانيالىق باسقارۋشى بارلىق قاجەتتى مەديتسينالىق پروتسەدۋرالاردى وتكىزۋ ءۇشىن ەگدە ايەلگە نيۋ-يورك كلينيكاسىنا بيولوگيالىق ماتەريالداردى اكەلۋگە رۇقسات ەتتى. مەديتسينالىق پروتسەدۋرالار قاتارىندا دونورلىق ۇرىقپەن ۇرىقتاندىرۋ دا بار.
بىرنەشە اي بۇرىن اپەللياتسيالىق سوت ەگدە جاستاعى ايەلدىڭ تالابىن تىڭداعان-دى. سوتتا ايەل 2011-جىلى ىشەك قاتەرلى ىسىگىنەن كوز جۇمعان 28 جاسار قىزىنىڭ انالىق جاسۋشاسىن قولدانۋعا رۇقسات سۇرعان ەدى.
بريتانيالىق اجە باقيلىققا اتتانار الدىندا قىزى ءوز بالالارىن دۇنيەگە اكەلۋدى وتىنگەنىن ايتادى. دەسە دە قىزى ءوز انالىق جاسۋشاسىن قولدانۋعا جازباشا كەلىسىم قالدىرماعان.
الايدا باسقارۋشى ۇيعارىمى بويىنشا، بۇل رەتتە ءسوز - «ەرەكشە ءارى سيرەك كەزدەسەتىن جاعداي» تۇرعىسىندا. وعان قوسا اتا-اناسىنا ەرەكشە تىلەك بىلدىرگەن قىز مۇنداي قيىندىقتار تۋىندايتىن بىلگەندە، جازباشا كەلىسىمنەن باس تارتپايتىن ەدى دەگەن قورىتىندى جاسادى.
«بۇل - وتە مۇڭدى وقيعا. ءبىز ءوز انالىق جۇمىرتقاسىن نە ۇرىعىن قاتىرىپ قويۋعا نيەتتى ادامداردى قايتىس بولعان جاعدايدا ماتەريالدى قولدانۋعا رۇقساتىن بۇگە-شىگەسىنە دەيىن جازۋعا شاقىرامىز»، - دەيدى قورعاۋشى ناتالي گەمبل.
