جىلاعان ءسابي انتاليا - الماتى ۇشاعىنداعى ۇرىسقا سەبەپ بولدى

استانا. قازاقپارات -  «انتاليا- الماتى» اۋە رەيسىن ورىنداعان تۇركيا اۋە كومپانياسى ۇشاعىنىڭ ۇشقىشتارى ءماجبۇرلى تۇردە اقتاۋ اۋەجايىنا قونىپ، ءتارتىپ بۇزۋشىلاردى پوليتسياعا تاپسىردى.

بۇل تۋرالى لادا حابارلايدى.

اقتاۋ حالىقارالىق اۋەجايىنا 12- قىركۇيەككە قاراعان تۇنگى ساعات 00:16-دا ATLAS JET\ATLAS GLOBAL اۋە كومپانياسىنىڭ ك6755 چارتەرلىك رەيسى كەلىپ قونعان. ۇشاقتىڭ قونۋىنا ەمىزۋلى نارەستەسى بار ايەل سەبەپشى بولعان.

ۇشاق بورتىندا ەمىزۋلى ءسابيى بار ايەل جولاۋشى بولدى. ءسابيى جىلاي بەردى. جولاۋشىلاردىڭ ءبىرى ونى بالاعاتتاپ بالاسىن جۇباتۋدى سۇرادى. وزگە دە جولاۋشىلار وسىلاي جاساعان. وسىدان كەيىن ۇرىس باستالعان. بورسەرىك بۇل جايلى ۇشاق كومانديرىنە حابارلاعان. سوندىقتان ۇشقىش اقتاۋ اۋەجايىنا قونۋعا بەل بايلاعان.

ۇرىسقا بايلانىستى ءىس اقتاۋ قالاسىنىڭ قالالىق سوتىنا جىبەرىلدى. ۇشاقتان ۇرىسقا سەبەپشى بولعان 3 وتباسى شىعارىلدى.

«200 جولاۋشىنى تاسىمالداپ كەلە جاتقان ۇشاق ەكيپاجى بورتتاعى ءۇش جولاۋشىنىڭ كەسىرىنەن اقتاۋ اۋەجايىنا قوندى. ولار ماس بولىپ، قاسىنداعى ادامداردى، بورتسەرىكتەردى بالاعاتتاعان»، - دەلىنگەن كولىكتەگى ءى ءى د حابارلاماسىندا.

انىقتالعانداي، ايقاي شىعارعان ءۇش جولاۋشى الماتى وبلىسىنىڭ تۇرعىندارى بولىپ شىقتى.

«ولار كولىكتەگى ءى ءى د- گە تاپسىرىلدى. ولارعا قاتىستى ۇساق ءتارتىپ بۇزۋ تۋرالى اكىمشىلىك حاتتاما تولتىرىلدى»، - دەدى ۆەدومستۆو باسپا ءسوز قىزمەتىندە.

اتالعان ۇشاق سول ءتۇنى 12- قىركۇيەك ساعات 3:22 دە ساپارىن جالعاستىردى.