استانا حالىقارالىق اۋەجايىنىڭ جانىنان جاڭا جۇك كەدەن بەكەتى اشىلدى
بۇگىن حالىقارالىق «استانا حالىقارالىق اۋەجايى» ا و باسقارما ءتوراعاسى پاولو ريچيوتتي مەن جاڭا كەدەن بەكەتىنىڭ باسشىسى اسقار بەكبەرگەنوۆ جۋرناليستەر ءۇشىن باسپا ءسوز ءماسليحاتىن وتكىزدى.
«قازاقستان ءۇشىن اۋە جۇك تاسىمالىنىڭ ورتالىعى الماتى قالاسى بولعانىن بىلەسىزدەر. دەگەنمەن، قازاقستاننىڭ ەلورداسى - استانا قالاسى دا جۇك تاسىمالى ءۇشىن الەۋەتتى ينفراقۇرىلىمعا لايىق قالا ەكەنىن كورسەتكىمىز كەلدى. ونىڭ ۇستىنە، اۋەجايدا، جالپى كاسىپكەرلەر اراسىندا اۋە جۇك تاسىمالىنا قاتىستى قازىرگى جانە بولاشاقتاعى بيزنەستى قولداۋ كەرەك. جانە وسى كەدەن بەكەتىن سالۋداعى تاعى ءبىر ماقسات - ەكسپو كورمەسى. ەكسپو كورمەسى كەزىندەگى جۇك تاسىمالىن بىلاي قويىپ، ەكسپو- دان كەيىنگى جاعدايدى زەرتتەي كەلە، حالىقارالىق كورمەدەن كەيىن جاڭا حالىقارالىق قارجى ورتالىعى اشىلاتىنىن ەسكەردىك. بۇل حالىقارالىق قارجى ورتالىعىنىڭ جۇمىسى اۋە تاسىمالى سالاسىندا دا وتە ساپالى، كەشىكپەيتىن قىزمەتتەردى تالاپ ەتەدى. سوندىقتان، قازىردەن باستاپ تەحنيكالىق مۇمكىندىكتەرىمىزدى قاراپ جاتىرمىز. وسىلايشا، كەدەن قىزمەتىندەگى ارىپتەستەرىمىزبەن تىعىز ىنتىماقتاستىق ورناتا وتىرىپ، وسى جۇك تاسىمالىنىڭ كەدەن بەكەتى ءۇشىن جاڭا عيمارات سالدىق» ، - دەيدى پ. ريچيوتتي.
ال، «استانا اۋەجاي» كەدەن بەكەتىنىڭ باسشىسى اسقار بەكبەرگەنوۆ بۇل جاڭا كەدەن بەكەتى كەدەنشىلەردىڭ دە، كليەنتتەردىڭ دە جۇمىسىن الدەقايدا جەڭىلدەتتى دەيدى.
«كىشكەنە كەرى شەگىنەر بولساق، بۇرىن استانادا اۋە جۇك تاسىمالى ءۇشىن ارنايى عيمارات بولماعان ەدى. ءبىز بىرەسە اۋەجاي عيماراتىندا، بىرەسە، قالا سىرتىندا جۇمىس ىستەپ جۇردىك. 1 - قىركۇيەك كۇنى جاڭا عيماراتقا كوشتىك. 5 - قىركۇيكتەن بەرى عيمارات تولىق جۇمىسىن باستادى. بۇل كەدەندىك راسىمدەۋ بەكەتى ءدال جۇك تەرمينالىنىڭ جانىندا ورنالاسقان. بۇل كەز كەلگەن كليەنتتىڭ جۇمىسىن الدەقايدا جەڭىلدەتەدى» ، - دەيدى ا. بەكبەرگەنوۆ.
«بۇل كەدەن بەكەتىنىڭ جۇك وتكىزۋ قۋاتى قانداي؟ » دەگەن «قازاقپارات» ءتىلشىسىنىڭ سۇراعىنا جاۋاپ بەرە وتىرىپ، ا. بەكبەرگەنوۆ: «بيىل جىل باسىنان بەرى اۋە جۇك تاسىمالى سالاسىندا 3200 دەكلاراتسيا تىركەلدى. بىلتىرعى جىلدىڭ وسى ۋاقىتىندا، دەكلاراتسيالار سانى 2500 شاماسىندا بولعان. ياعني، جاڭا اۋە جۇگىن راسىمدەيتىن وسى كەدەن بەكەتى بۇل سالاداعى كورسەتكىشتى كوبەيتەتىنى ءسوزسىز» دەپ جاۋاپ بەردى.
