قوستاناي وبلىسىندا پوليتسيا تۇرعىندى ساۋساعىڭدى كەسىپ تاستايمىز دەپ قورقىتقان
بۇل تۋرالى وبلىستىق سوتتىڭ باسپا ءسوز قىزمەتى حابارلادى.
ءىس ماتەريالى بويىنشا، وسى جىلدىڭ 10- ساۋىرىندە ساعات شامامەن 09:00 دە قارابالىق پوليتسيا بولىمشەسىنىڭ قىزمەتكەرلەرى ەسەنكول اۋىلىنداعى زارداپ شەگۋشى 20 جاستاعى د- نىڭ ۇيىنە بارىپ، ونى وزدەرىمەن بىرگە پوليتسيا پۋنكتىنە شاقىرادى. قىزدىڭ ۇيىندە 2015-جىلى تۋعان بالاسى قالعان. زارداپ شەگۋشى د. كۇيەۋگە شىقپاعان. ول كىشكەنتاي ءسابيى جانە اناسىمەن بىرگە تۇرادى ەكەن.
جاس انانى ولار ۋچاسكەلىك ينسپەكتوردىڭ كابينەتىنە الىپ كەلگەن.
«ولار دورەكى تۇردە ۇرلىق جاساعانىن مويىنداۋعا ماجبۇرلەيدى. پوليتسيا اعا لەيتەنانتى س. پوليتسيا مايورى ت. -نىڭ ءۇنسىز كەلىسىمىمەن، ەگەر قويىلعان سۇراقتارعا جاۋاپ بەرمەسەڭ ءبىر ساۋساعىڭنان كەسىپ وتىرامىن دەپ قورقىتقان»، - دەلىنگەن حابارلامادا.
الايدا زارداپ شەگۋشى ەش ۇندەمەي، پوليتسيا قىزمەتكەرىنىڭ سۇراقتارىنا جاۋاپ بەرمەگەن.
«سول كەزدە س. ازاماتشا وتىرعان ۇستەلدىڭ جانىنا كەلىپ، ونى شاشىنان تارتىپ ەدەنگە ۇرىپ، اياعىمەن كەۋدەسىنەن تەپكىلەگەن. قىزدى ورىنىنان تۇرعىزىپ، وڭ قولىن ارتىنا قايىرىپ وڭ جاق قۇلاق شەكەسىنەن جۇدىرىقپەن ۇرعان. قىز بەتىنەن دە بىرنەشە سوققى العان»، - دەپ جازىلعان ماتىندە.
بۇل ءىس بويىنشا سوت ءىستى وسى جىلدىڭ 16- قىركۇيەگىندە قارايدى.
