نۇرتاس ادامبايەۆ: «قازاق فيلم» بيۋدجەتىمەن الەمدىك نارىققا ارنالعان كينو تۇسىرۋگە بولادى
بەلگىلى رەجيسسەر نۇرتاس ادامبايەۆ ءوزىنىڭ فەيسبۋكتاعى پاراقشاسىندا وسىنداي پىكىر قالدىردى.
«قازاق فيلم» بيۋدجەتىمەن الەمدىك نارىققا ارنالعان كينو تۇسىرۋگە جانە ودان مول قارجى جاساۋعا بولادى. بۇعان قوسا، قازاقستان جاقسى فيلمدەر تۇسىرەتىن ەل رەتىندە تانىمال بولا الادى. بۇدان باسقا «مەگا-جوبالارعا» قاراعاندا الدەقايدا كوپ پايدا بولار ەدى»، - دەپ جازدى ن. ادامبايەۆ.
ايتا كەتەرلىگى، بۇعان دەيىن دە ول ت. بەكمامبەتوۆتىڭ وتاندىق فيلمدەردىڭ بيلەت باعاسىن ارزانداتۋ جانە ارنايى ابونەمەنت ەنگىزۋ ۇسىنىستارىنا قاتىستى پىكىر بىلدىرگەن ەدى.
«ارينە، مەن تيمۋردى قۇرمەتتەيمىن. دەگەنمەن، بۇل ماسەلەدە مەن ونىمەن كەلىسپەيمىن. قازاقستاندىقتار وتاندىق كينولاردى راحاتتانىپ كورەدى. ءبىز باياعىدا دا باتىس پەن رەسەيلىك فيلمدەرگە تويعانبىز. ءبىزدىڭ ستۋديانىڭ العاشقى ءۇش فيلمىنىڭ كاسسالىق ءتۇسىمى مۇنى دالەلدەدى. قازاقستاندىق فيلمدەردىڭ بيلەت باعاسىن تومەندەتكەنشە وتاندىق كينو زور سۇرانىسقا يە بولۋى ءۇشىن شىنايى بىردەڭەلەر جاساۋعا ۇمتىلۋ قاجەت شىعار. مۇمكىن بيۋدجەت قارجىسىن اقىلمەن جۇمساپ، شىنايى قىزىقتى فيلمدەر تۇسىرەرمىز؟ مۇمكىن ونسىز دا قيىن جاعدايدا وتىرعان جەكە ستۋديالارعا قولداۋ كورسەتكەن دۇرىس شىعار؟ جەرگىلىكتى فيلمدەردىڭ بيلەتى قانشا تۇرۋ قاجەتتىگىن تالقىلاۋ ءۇشىن تيمۋردىڭ ءوزى قانشا قازاقستاندىق فيلم ءتۇسىرىپتى؟ مۇنداي يدەيانى نەلىكتەن ول رەسەيدە ۇسىنبايدى؟ رەسەيلىك كينونى دا امەريكالىقپەن سالىستىرۋعا كەلمەيدى»، - دەپ جازدى ول.
سونىمەن قاتار ول ن. ادامبايەۆ قازاقستاندىق كينو بيلەتىنىڭ باعاسىن تومەندەتۋ ارقىلى ەڭ الدىمەن ءوزىمىزدى تومەندەتەمىز دەگەن ويىن دا بىلدىرگەن.
«وسى ارقىلى ءبىز بارلىعىنا دا ارتتا قالعاندىعىمىزدى بىلدىرەمىز. ويتكەنى ءبىزدىڭ كينو ارزان. بەكمامبەتوۆ كينو رەجيسسەرى رەتىندە فيلمدى تۇسىرۋگە قانشا اقشا جۇمسالعانى ەمەس، ونىڭ كورەرمەنگە قانشالىقتى قىزىقتى ەكەندىگى ماڭىزدى ەكەندىگىن ءتۇسىنۋى ءتيىس. ادامدار 100-200 تەڭگە ۇنەمدەپ، بىلە تۇرا ناشار كينوعا بارادى دەپ ويلامايمىن. كينو بۇل وتە ءادىل. جاقسى فيلم بولسا ادامدار بارادى، ونشا بولماسا بارمايدى. ال ابونەمەنتكە قاتىستى يدەياسى قيىن كەزەڭدەگى ازىق-تۇلىككە ارنالعان تالون جۇيەسىن ەسكە تۇسىرەدى»، - دەدى رەجيسسەر.
اۆتور: مارلان جيەمباي
