تۇركىمەنستان پرەزيدەنتى ەلدى ءومىرىنىڭ سوڭىنا دەيىن باسقارۋعا نيەتتەنىپ وتىر
بۇعان دەيىنگى زاڭدار جيناعىندا پرەزيدەنت ەلدى 70 جاسقا دەيىن باسقارا الادى دەگەن شەكتەۋ بولاتىن. ەندى جاڭا زاڭنان بۇل شەكتەۋ الىنىپ تاستالىندى دەپ جازادى sn.kz.
سونداي-اق، پرەزيدەنتتىك مەرزىمى 5 جىلدان 7 جىلعا دەيىن سوزىلىپ وتىر دەپ جازادى ر ي ا نوۆوستي.
جاڭا كونستيتۋتسيانى ءماجىلىس ءبىراۋىزدان قابىلداعان. داۋىس بەرۋ ءراسىمى تۇركىمەنستان اقساقالدار كەڭەسىنىڭ جيىنىندا وتكىزىلدى. پرەزيدەنت گۋربانگۋلى بەردىمۇحامەدوۆ بولسا زاڭعا كوپ ويلانباستان قول قويىپ، ول ارتىنشا كۇشىنە ەنگەن.
ەسكى كونستيتۋتسياعا سايكەس، پرەزيدەنتتىك سايلاۋعا تۇسەتىن ۇمىكەردىڭ جاس ەرەكشەلىگى 40 تان تومەن ەمەس جانە 70 تەن اسپاۋى ءتيىس. سونداي-اق، ول تۇركىمەنستان رەسپۋبليكاسىنىڭ ازاماتى بولۋى ءتيىس.
«تۇركىمەنستاننىڭ جاڭا كونستيتۋتسياسىنىڭ قابىلدانۋى ەلدىڭ الەۋمەتتىك-ەكونوميكالىق جانە رۋحاني دامۋىنا ءوز سەپتىگىن تيگىزەدى. تۇركىمەنستاننىڭ جاڭا كونستيتۋتسياسى حالىقارالىق زاڭنامالىق تاجىريبەلەرگە سۇيەنە وتىرىپ ازىرلەنگەن»، - دەدى بەردىمۇحامەدوۆ.
