سيرەك كەزدەسەتىن كولىكتەر الماتىلىقتاردى تاڭعالدىردى - فوتو
VILLA Retro Car - جىل سايىن حالىقارالىق دەڭگەيدە ۇيىمداستىرىلاتىن مادەني جانە تاريحي شارا. بيىل الماتى قالاسى اكىمدىگىنىڭ، سونداي- اق رەسەي اۆتوكولىك فەدەراتسياسى مەن كلاسسيكالىق اۆتوموبيلدەر راللي كلۋبىنىڭ قولداۋىمەن جۇزەگە استى. كورمە بارىسىندا تەمىر تۇلپارلارعا قىزىعۋشىلار ءار كولىكتىڭ شىعۋ تاريحىمەن تانىسىپ، وزدەرىن قىزىقتىرعان سۇراقتارعا جاۋاپ الدى.
VILLA Boutiques Restaurants كوپ سالالى كەشەنى جىل سايىن رەتروكولىكتەر قاتارىن كوبەيتىپ، كەلۋشىلەردى تاڭعالدىرۋعا تىرىسادى. ماسەلەن، 2014 -جىلى - 18, 2015 -جىلى 42 كوللەكتسيا قويىلسا، بيىل 41 اۆتوموبيل «استانا» الاڭىنا شىعارىلدى. جينالعاندار ءتورت دوڭگەلەكتەردى قىزىقتاپ قانا قويماي، الەكساندر بەلياكوۆ جەتەكشىلىك ەتەتىن الماتى قالاسى اكىمدىگىنىڭ ەسترادالىق- سيمفونيالىق وركەسترى مەن قازاقستاننىڭ ۇلتتىق چەرليدرينگ فەدەراتسياسىنىڭ ونەرىن تاماشالادى. ودان كەيىن شىققانىنا 40 جىلدان استام ۋاقىت وتكەن Mercedes پەن «پوبەدا» ماركىلى كولىكتەر ەسكى الاڭنان مەدەۋ مۇز ايدىنىنا دەيىن جول تارتتى. شەرۋ VILLA Boutiques Restaurants كەشەنىندە اياقتالىپ، قاتىسۋشىلار باعالى سىيلىقتارمەن ماراپاتتالدى.
قالا اكىمى باۋىرجان بايبەك:
- قازىرگى كۇنى قالا كوشەلەرىنەن اۆتوموبيلدەردىڭ نەبىر ءتۇرىن كورۋگە بولادى. ءبىراق سولاردىڭ ىشىندە كوڭىلگە ەرەكشە جىلىلىق ۇيالاتاتىنى، ەڭ ءساندىسى مەن اسا باعالىسى بۇگىنگى كورمەگە قويىلعان كولىكتەر. باسقا دا كوللەكتسيونەرلەردىڭ قولىندا ساقتاۋلى تۇرعان تەمىر تۇلپارلار بار ەكەنىن بىلەمىن. ول ازاماتتار دا الداعى ۋاقىتتا وسى شاراعا قاتىسىپ، جادىگەرلەرىن حالىققا كورسەتەدى دەگەن ويدامىن، - دەپ اتاپ ءوتتى.
كورمەگە قويىلعان ەكسپوناتتاردى قازاقستاندىق جانە شەتەلدىك جوعارى بىلىكتى ساراپشى ۇيىمدار مەن رەسەي اۆتوكولىك فەدەراتسياسى راللي كوميتەتىنىڭ ءتوراعاسى يگور سۋحوۆ، كلاسسيكالىق اۆتوموبيلدەر راللي كلۋبىنىڭ پرەزيدەنتى ستانيسلاۆ سولوۆيەۆ، «ماسكەۋ ترانسپورتى» مۋزەيىنىڭ ديرەكتورى دميتري وكتيابرسكي باستاعان قازىلار القاسى تالقىعا سالدى. ناتيجەسىندە، 1964 -جىلى قۇراستىرىلعان اندرەي - تاتيانا پانكوۆسكيلەردىڭ Porsche 356 cabrio 1600 SS كولىگى باس جۇلدەگە يە بولدى. ودان كەيىنگى ورىنداردى 1959 -جىلى شىققان كيريلل ەۆستافيەۆ پەن يگور فەدوروۆتىڭ Cadillac DeVILLE جانە ەۆگەني - ارينا ەروفەيەۆتەردىڭ Bentley S2 (1962) كولىگى ءوزارا ءبولىستى. ارناۋلى جۇلدەلەر دە ءوز يەسىن تاۋىپ، Mercedes Benz w114/8 (1970) ، گاز 21 (1967) ، Mercedes Benz w111 (1971) تۇلپارلارى ۇزدىك دەپ تانىلدى. الماتى قالاسى اكىمىنىڭ كۋبوگى Mercedes Benz w114/8 (1970) كولىگىنىڭ قوجايىنىنا تابىستالدى.
جينالعاندار الەكساندر بەلياكوۆ جەتەكشىلىك ەتەتىن الماتى قالاسى اكىمدىگىنىڭ ەسترادالىق- سيمفونيالىق وركەسترى مەن قازاقستاننىڭ ۇلتتىق چەرليدرينگ فەدەراتسياسىنىڭ، Private Jet توبىنىڭ ونەرىن تاماشالادى.
«ايقىن»
