قازاقستانعا كينو تۋرالى جەكە زاڭ قاجەت
مينيستر ءوز سوزىندە قازاقستانداعى كينەماتوگرافيانى 2050 -جىلعا دەيىن دامىتۋ تۇجىرىمداماسىنىڭ قابىلدانۋى ەلىمىزدەگى كينەماتوگرافيانىڭ احۋالىن جاقسارتۋعا باعىتتالعان ماڭىزدى قادام بولاتىندىعىن باسا ايتتى. وسى ارقىلى مەملەكەتتىك ورگاندار، كينەماتوگرافيا سالاسىنداعى كينەماتوگراف ۇيىمدار اراسىنداعى ۇيلەستىرۋشى تەتىك پەن باعدارلامالىق ارەكەت قىزمەتىن اتقارۋى تيىستىگىن اتاپ ءوتتى.
«قازاقستاننىڭ تاۋەلسىزدىك جىلدارى ىشىندە مۇنداي تۇجىرىمداما العاش رەت ازىرلەنىپ وتىر. ەگەر ءبىز كينو تۋرالى جەكە زاڭ قابىلداي الار بولساق، وتە قۋانىشتى جايت بولادى. وندا ونەردىڭ وسىناۋ تۇرىنە قاتىسى بار بارلىق قىزمەت تۇرلەرى جازىلار ەدى. بۇل ءبىز ءۇشىن وتە ماڭىزدى» ، - دەدى ول.
سونىمەن قاتار، مۇحامەدي ۇلى بۇگىنگى كۇنى ەلىمىزدە مادەنيەت تۋرالى وتە جاقسى زاڭ قابىلدانعانىن، وندا كىتاپحانا ءىسىن، مۋزەي ءىسىن، كينەماتوگرافيانى جانە باسقا دا سالالاردى دامىتۋ تەتىكتەرى جان- جاقتى كورسەتىلگەنىن ەسكە سالدى.
«دەگەنمەن، ءومىردىڭ ءوزى كورسەتىپ وتىرعانداي، بىزگە كينو تۋرالى جەكە زاڭ اسا قاجەت. مەن بۇل ماسەلەگە تۇسىنىستىكپەن قاراعان ءبىزدىڭ ەكسپەرتتىك قوعامداستىققا ريزامىن. سەبەبى، بۇل - قاراپايىم ماسەلە ەمەس. بۇگىندە ءبىز فرانتسيا، رەسەي جانە باسقا دا ەلدەردىڭ كينەماتوگرافيا تۋرالى زاڭدارىن زەردەلەدىك» ، - دەدى مۇحامەدي ۇلى.
