ساعىنتايەۆ مينيسترلەر كابينەتىنە ءبىرقاتار تاپسىرمالار جۇكتەدى

استانا. قازاقپارات - ۇكىمەت باسشىسى باقىتجان ساعىنتايەۆ مينيسترلەرگە ءبىرقاتار تاپسىرمالار جۇكتەدى.

ۇكىمەت وتىرىسى بارىسىندا، بيزنەستى قولداۋ قۇرالدارىن ودان ءارى جەتىلدىرۋ جانە مەملەكەتتىك-جەكەمەنشىك سەرىكتەستىك قولدانۋ تەتىكتەرىن ەنگىزۋ بويىنشا تاپسىرمالار بەرىلدى.

«ۇلتتىق ەكونوميكا مينيسترلىگىنە، دەنساۋلىق ساقتاۋ جانە الەۋمەتتىك دامۋ مينيسترلىگىنە، مۇددەلى مەملەكەتتىك ورگاندارمەن بىرگە جۇمىسپەن قامتۋدى ىنتالاندىرۋ تەتىكتەرىن دامىتۋ بويىنشا ۇسىنىستى ۇكىمەتكە ەنگىزۋدى تاپسىرامىن. ونىڭ ىشىندە، شاعىن نەسيەلەندىرۋ باعدارلاماسىنا، ونىڭ ىشىندە اۋىل ادامدارىن نەسيەلەندىرۋگە ماڭىز بەرۋ قاجەت. دەنساۋلىق ساقتاۋ جانە الەۋمەتتىك دامۋ مينيسترلىگىنە اكىمدەرمەن بىرگە ازاماتتاردىڭ ەڭبەك موبيلدىلىگىن قامتاماسىز ەتۋ بويىنشا قوسىمشا شارالاردى قابىلداۋدى جۇكتەيمىن. ءبىلىم جانە عىلىم مينيسترلىگىنە تۇلەكتەردى تەگىن كاسىپتىك ءبىلىم بەرۋ باعدارلاماسىن مەرزىمىنە سايكەس جۇزەگە اسىرۋدى قولعا السىن. ۇلتتىق ەكونوميكا مينيسترلىگى اكىمدەرمەن بىرگە م ج س تەتىكتەرىن بەلسەندى قولدانۋ شارالارىن قابىلداسىن»، - دەدى پرەمەر.

سونىمەن قاتار ول بارلىق مەملەكەتتىك ورگاندار جانە ولاردىڭ ۆەدومستۆولىق ۇيىمدارى قايتا ينۆەنتەريزاتسيادان وتكىزىلۋىن بۇيىردى.

«كەڭەيتىلگەن وتىرىستا مەملەكەت باسشىسى 11 مينيسترلىكتە 371 ۆەدومستۆولىق ۇيىم بارىن ايتتى. مۇنشاما ۇيىمنىڭ قاجەتى بار ما؟! ولاردىڭ اكىمشىلىك شىعىندارىنا عانا بىلتىر 119 ميلليارد تەڭگە جۇمسالدى. بۇل وتە كوپ قاراجات. بۇل تەك ورتالىق مەملەكەتتىك ورگاندار بويىنشا. اكىمدىكتەردە تاعى 6500 ۇيىم بار. الايدا جەكەشەلەندىرۋدىڭ كەشەندى باعدارلاماسى اياسىندا ساتىلىمعا تەك 416 نىسان قويىلدى. بۇل تەك جالپى كولەمنىڭ %6 ى عانا. سوندىقتان قارجى مينيسترلىگىنە جانە ۇلتتىق ەكونوميكا مينيسترلىگىنە ينۆەنتەريزاتسيا ماسەلەسىنە وتە قاتاڭ قاراۋدى تاپسىرامىن. قانداي ۇيىم قاجەت، قانداي ۇيىم جەكەمەنشىك ۇلەسكە كەتە الاتىنىن انىقتاۋ قاجەت. وسىنداي جۇمىستى اكىمدىكتەر وزدەرىندە جۇرگىزۋلەرى شارت»، - دەپ اتاپ ءوتتى ب. ساعىنتايەۆ.