باقىتجان ساعىنتايەۆ ق ر ۇكىمەتى قۇرامىنىڭ جاڭا مۇشەلەرىن تانىستىردى

استانا. قازاقپارات - ۇكىمەت قۇرامىنىڭ كوپ وزگەرمەۋى ەلباسىنىڭ بىزگە زور سەنىمىن بىلدىرەدى.

بۇگىن جاڭا جاساقتالعان ق ر ۇكىمەتىنىڭ العاشقى وتىرىسىن وتكىزگەن ق ر پرەمەر-ءمينيسترى باقىتجان ساعىنتايەۆ وسىلاي مالىمدەدى.

«مەملەكەت باسشىسى نۇرسۇلتان نازاربايەۆ ءوزىنىڭ جارلىقتارىمەن ۇكىمەتتىڭ جاڭا قۇرامىن بەكىتتى. كورىپ وتىرعاندارىڭىزداي، كوپ كادرلىق وزگەرىستەر بولعان جوق. مۇنى ەلباسىنىڭ ءبىزدىڭ بارىمىزگە كورسەتكەن ۇلكەن سەنىمى دەپ قابىلداۋىمىز كەرەك. سوندىقتان، ۇكىمەت مۇشەلەرىنىڭ اتىنان، ءوزىمنىڭ اتىمنان كورسەتىپ وتىرعان قولداۋى مەن سەنىمى ءۇشىن العىس ايتقىم كەلەدى»، دەدى ب. ساعىنتايەۆ.

سونىمەن قاتار، پرەمەر-مينيستر ۇكىمەتتىڭ جاڭا مۇشەلەرىن دە تانىستىرىپ ءوتتى. اتاپ ايتقاندا، ەلباسى جارلىعىمەن پرەمەر-ءمينيستردىڭ ءبىرىنشى ورىنباسارى بولىپ تاعايىندالعان اسقار مامين مەن يمانعالي تاسماعامبەتوۆ. «يمانعالي تاسماعامبەتوۆتى ەلگە تانىستىرىپ جاتۋ ارتىق. مەملەكەتتىڭ ەڭ ماڭىزدى سالالارىندا قىزمەت اتقارىپ كەلە جاتقان اسا تاجىريبەلى تۇلعا. ەلباسىنىڭ ۇلكەن سەنىمىنە يە مىقتى ۇيىمداستىرۋشى، ىسكەر باسشى»، دەي كەلە، جاڭا قىزمەت يەلەرىن قۇتتىقتادى. سونىمەن قاتار، ۇكىمەت باسشىسى جاڭادان ءدىن ىستەرى جانە ازاماتتىق قوعام مينيسترلىگى قۇرىلعانىن، ونىڭ باسشىلىعىنا نۇرلان ەرمەكبايەۆ تاعايىندالعانىن اتاپ ءوتتى. بۇدان بولەك، باقىتجان ساعىنتايەۆ ساكەن جاسۇزاقوۆ قورعانىس ءمينيسترى، مارات بەكەتايەۆ ادىلەت ءمينيسترى بولعانىن ايتىپ، ولاردىڭ جۇمىسىنا ساتتىلىك تىلەدى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ق ر پرەزيدەنتىنە تىكەلەي باعىناتىن ورگان بولىپ قۇرىلعانىن اتاپ ءوتتى.