20:57, 13 - قىركۇيەك 2016 | GMT +5
گولوۆكين كومانداسى ونىڭ برۋكپەن كەزدەسۋى الدىندا اۋىردى دەگەن سىبىستىڭ سەبەبىن اتادى
استانا. قازاقپارات - گەننادي گولوۆكيننىڭ پروموۋتەرى جانە باپكەرى كەلل برۋكپەن كەزدەسۋ الدىنداعى بوكسشىنىڭ جاعدايى تۋرالى ءتۇسىندىردى، دەپ حابارلادى Sports.kz.
«بۇل سىبىستىڭ قايدان شىققانىن بىلمەيمىن. ب ا ق باسپا ءسوز ءماسليحاتىنان كەيىن گەنناديدەن سۇحبات الماق بولعان، الايدا سپورتشى قوناق ۇيگە كەتكەندىكتەن وسىنداي قاۋەسەت پايدا بولدى دەپ ويلايمىن. ولار بوكسشى اۋىرىپ تۇر دەپ ويلاپ، تۇيمەدەيدى تۇيەدەي ەتتى»، - دەدى Boxingscene.com GGG پروموۋتەرى توم لەففلەر.
گەننادي باپكەرى ابەل سانچەستىڭ سوزىنە قاراعاندا، ەكى ساعاتتاي كولىك كەپتەلىسىندە تۇرىپ قالعان بوكسشىنىڭ كوڭىل-كۇيى بولماعان. سوندىقتان ول سالماقتى ولشەگەن سوڭ، قوناق ۇيگە كەتپەك بولدى.
«سالماق ولشەيتىن كۇنى قوناق ۇيدەن سول جەرگە ءبىر ساعات 40 مينۋتتاي جەتكەنبىز. بۇل كوڭىل-كۇيگە اسەر ەتتى. بۇدان كەيىن ول قوناق ۇيگە بارعىسى كەلدى»، - دەدى سانچەس.
