ءمادينا بالعابايەۆا بايان ەسەنتايەۆا تۋرالى جاڭالىقتى ەركىنەن تىس جاريالاعانىن ايتتى

استانا. قازاقپارات - تانىمال تەلەجۇرگىزۋشى ءارى بايان ەسەنتايەۆانىڭ جاقىن قۇربىسى ءمادينا بالعابايەۆا قۇربىسى تۋرالى جاعىمسىز جاڭالىقتى ەركىنەن تىس جاريالاعانىن مالىمدەدى.

جۋىردا تانىمال قازاقستاندىق پروديۋسەر بايان ەسەنتايەۆا ارىپتەسى دينارا ءساتجانعا سۇحبات بەرىپ، 10- ماۋسىمدا بولعان اتى شۋلى وقيعا تۋرالى ءوز اۋزىمەن ايتىپ بەرگەن ەدى. پروديۋسەر بۇل سۇحباتقا امالسىزدان كەلىسكەنىن ايتىپ قىنجىلدى ءارى ب ا ق وكىلدەرىنە رەنىشىن جاسىرمادى.

ەكسكليۋزيۆتى سۇحباتتى ەلىمىزدىڭ بارلىق بۇقارالىق اقپارات قۇرالدارى جاريالاعان-دى.

ەسەنتايەۆانىڭ ءسىڭلىسى باعىم مۇحيتدەنوۆا «ك ت ك» ارناسىنداعى كەشكى جاڭالىقتاردان كەيىن پوست جازىپ، تەلەارنالار مەن باسقا دا اقپارات قۇرالدارىنا رەنىشتى ەكەنىن ءبىلدىردى. سونداي-اق، ول ەفيرگە شىققان ءمادينا بالعابايەۆانىڭ سۋرەتىن جاريالادى.

سودان كەيىن جەلى قولدانۋشىلارى تەلەجۇرگىزۋشىگە ءتۇرلى سوزدەر ايتىپ، «شابۋىلدادى». انىعىندا، جۇرت ەسەنتايەۆا تۋرالى اقپاراتتى نەلىكتەن بالعابايەۆانىڭ تاراتقانىن بىلگىسى كەلدى.

اشىنعان تەلەجۇرىزۋشى حالىققا ءوز جاۋابىن بەردى.

«كەشەدەن بەرى كوممەنتتەرىڭىزدى وقىپ ءجۇرمىن. نەگىزى، جاۋاپ بەرەتىندەي ەشقانداي ىنتا جوق... ءبىراق شىداماي كەتتىم... كەشەگى ەفير جايىندا. دوستار، ەكى وتتىڭ ورتاسىندا جۇرگەن مەن قانداي كۇيدە جۇرگەنىمدى ءبىر وزىمە ايان... مەنىڭ جەكە ارنام جوق، مەنشىككە اكەم قالدىرىپ كەتكەن «ك ت ك»- جوق. بۇل مەنىڭ نان تاۋىپ وتىرعان جۇمىسىم. مەنىڭ جۇرگىزۋشىلىك مىندەتتەرىم بار، جيىرما جۋرناليست كۇنى بويى زار يلەپ جازىپ شىققان ماتەريالداردى مەن جارىققا شىعارۋىم كەرەك»، - دەپ جازدى بالعابايەۆا جەلىدەگى پاراقشاسىندا.

ودان ءارى تەلەجۇرگىزۋشى ەسەنتايەۆتار وتباسىنىڭ وزىنە جاقىن ەكەندىگىن ايتىپ، قىنجىلدى. ايتۋىنشا، وسىدان ءۇش اي بۇرىن قايعىلى وقيعا تۋرالى اقپاراتتى ەفيرگە شىعارماۋ ءۇشىن ول بارىن سالعان. بۇل جولى تەلەجۇرگىزۋشىنىڭ قاۋقارى جەتپەگەن.

«كەشە قۇربىم جايلى ماتەريال دا بولدى. وسىدان ءۇش اي بۇرىن بۇل جاعداي بولعان كۇنى، ەلگە تاراماي تۇرىپ مەن ەفيرگە شىعارماۋعا بارىنشا كۇشىمدى سالدىم، ول كەزدە ەكرانعا شىقپادى. ال وسى جولى مەنىڭ قاۋقارىم جەتپەدى... بۇكىل عالامتور، ينتەرنەت، تەليەۆيدەنيە، راديو شۋلاپ- سۇحباتىن بەرىپ جاتقاندا ەكرانعا شىعارماۋعا مەنىڭ ءالىم جەتپەدى... تۇسىنگەن ادام تۇسىنەر، تۇسىنبەگەن ءوزى بىلەر... ەشقانداي سۇراق قويماساڭىز- ريزامىن. بۇل وتباسى مەن ءۇشىن ەرەكشە ىستىق...» - دەپ تۇيىندەدى ءسوزىن تەلەجۇرگىزۋشى.

ايتا كەتەيىك، ەسەنتايەۆانىڭ ەكسكليۋزيۆتى سۇحباتىنىڭ جالعاسى شىعادى. بۇل تۋرالى اقپارات قۇرالدارىنا ەسەنتايەۆانىڭ ارىپتەس- قۇربىسى دينارا ءساتجان ايتقان ەدى.